बिपन्न समुदायका विद्यार्थीलाई न्यानो कपडा

विराटनगर । पहिलो पाइला विराटनगरले सञ्चालन गरेको न्यानो माया अभियान २०७९ अन्तर्गत विपन्न समुदायका बालबालिकालाई न्यानो कपडा वितरण गरिएको छ ।

विराटनगर महानगरपलिका–१८ भेडयारीमा रहेको विराट प्राथमिक विद्यालयमा अध्ययनरत ८५ जना विपन्न बालबलिकालाई स्विटर, टोपी , मोजा लगायतका न्यानो कपडा वितरण गरिएको हो ।

वडाअध्यक्ष जितेन्द्रकुमार साहको प्रमुख आतिथ्यमा भएको कार्यक्रममा विद्याथीहरुलाई कपडा वितरण गरिएको संस्थाका अध्यक्ष प्रदिप कार्कीले जानकारी दिए ।

यसअघि संस्थाले सामुदायिक विद्यालयमा अध्ययनरत आर्थिक रुपमा विपन्न विद्यार्थीलक्षित ‘न्यानो माया’ अभियान सुरु गर्दै सहयोग जुटाउने काम गरेको थियो ।

अभियान अन्तर्गत विराटनगरको ट्राफिक चौकमा शनिबार चिया बिक्री गर्दै आर्थिक संकलन गरिएको थियो ।

• चिया पिउँदै समाजसेवा (फाेटाेफिचर)

‘तपाईँको चियापान बालबालिकालाई न्यानोपन’ नारासहित आयोजित कार्यक्रमबाट संकलित रकमबाट विद्यार्थीका लागि न्यानो कपडा जुटाइएको हो ।

पाँच वर्षदेखि संस्थाले विभिन्न समयमा सामाजिक कार्य गर्दै आइरहेको छ ।