मापदण्ड विपरीत प्रयाेग भएका सरकारी गाडी फिर्ता गर्दै सरकार

काठमाडौं । मापदण्ड विपरीत प्रयोग भएका सरकारी गाडीहरु सरकारले तत्कालै फिर्ता गराउने भएको छ । पहुँचवालाबाट सरकारी गाडी दुरुपयोग भएको गुनासो आएपछि सरकारले फिर्ता गर्ने भएको हाे ।

मुख्य सचिवको नेतृत्वमा सोमबार बसेको सचिवहरुको बैठकले यदि कुनै पदाधिकारी वा कर्मचारीले प्रचलित मापदण्ड विपरीत सवारी साधन प्रयोग गरेको भए तुरुन्त फिर्ता गराउने निर्णय गरेको हाे ।

‘मन्त्रालय, आयोग, सचिवालय, विभाग, बोर्ड, संस्थान, प्राधिकरण समिति आदि निकायका सवारी साधनहरू र प्रयोगकर्ताको विवरण पठाउन बाँकी मन्त्रालयहरूले तत्कालै प्रधानमन्त्री तथा मन्त्रिपरिषद्को कार्यालयमा पठाउने,’ सचिव बैठकको निर्णयमा भनिएको छ, ‘यदि कुनै पदाधिकारी/कर्मचारीहरूले प्रचलित मापदण्ड विपरीत सवारी साधन प्रयोग गरेको भए तुरुन्त फिर्ता गर्ने, गराउने ।’