प्रधानमन्त्री भदौ अन्तिममा भारत भ्रमणमा जाने

काठमाडौं । प्रधानमन्त्री केपी शर्मा ओलीले भदौ ३१ देखि भारतको भ्रमण गर्ने भएका छन् । भारतीय प्रधानमन्त्री नरेन्द्र मोदीका तर्फबाट समकक्षी ओलीलाई दुई दिने भ्रमणका लागि निमन्त्रणा आएको प्रधानमन्त्र कार्यालय स्रोतले जनाएको छ ।

प्रधानमन्त्री ओली सहितको टोली भदौ ३१ गते भारतको राजधानी नयाँ दिल्ली प्रस्थान गर्ने जनाइएको छ । त्यसको भोलिपल्ट अर्थात् १ असोजमा काठमाडौं फर्कने कार्यक्रम छ ।

भ्रमणका क्रममा दुईपक्षीय सम्बन्धलाई अझै बलियो र सौहार्द बनाउने, विगतका समझदारीहरुलाई निरन्तरता दिने र केही नयाँ परियोजनाहरुलाई अघि बढाउनेतर्फ केन्द्रित हुने स्रोतको भनाइ छ ।

दुईपक्षीय सीमा व्यवस्थापन समूहको गृहसचिव स्तरीय बैठक त्यसअघि दिल्लीमा बस्ने भएको छ । यसका लागि नेपालले तयारी सुरु गरिसकेको जनाइएको छ ।