‘कोशी प्रदेश सरकारले चालु आर्थिक वर्षमा कुल बजेटको ७७ प्रतिशत खर्च गर्‍याे’

कोशी प्रदेश सरकारले चालु आर्थिक वर्षमा कुल ३५ अर्ब २७ करोड ९३ लाख रुपैयाँको बजेट ल्याएको थियो। त्यसमध्ये हालसम्म २७ अर्ब २५ करोड ६० लाख रुपैयाँ खर्च भइसकेको छ। यो कुल बजेटको करिब ७७.२६ प्रतिशत हो, आर्थिक मामिला तथा योजना मन्त्रालयले जानकारी दिएको छ।

प्रदेश सरकारले पूँजीगततर्फ १३ अर्ब ८२ करोड रुपैयाँ खर्च गरेको छ, जुन विनियोजित पूँजीगत बजेटको ७९.२६ प्रतिशत हो। चालू खर्चतर्फ १२ अर्ब ४२ करोड रुपैयाँ अर्थात् ७५.२९ प्रतिशत रकम खर्च गरिएको छ।

भौतिक पूर्वाधार विकास मन्त्रालयले विनियोजित ११ अर्ब १९ करोड रुपैयाँ बजेटमध्ये ८ अर्ब ५० करोड रुपैयाँ खर्च गरेको छ। त्यस्तै, खानेपानी, सिँचाइ तथा ऊर्जा मन्त्रालयले ४ अर्ब ४ करोड रुपैयाँ खर्च गरेको छ, जुन सो मन्त्रालयका लागि छुट्याइएको ४ अर्ब ४२ करोड ५३ लाखभन्दा केही कम हो।

स्थानीय तहका लागि छुट्याइएको ५ अर्ब ६ करोड ८५ लाख रुपैयाँमध्ये ४ अर्ब ८७ करोड ९४ लाख रुपैयाँ खर्च भइसकेको छ। यो खर्च स्थानीय सरकारहरूद्वारा पूर्वनिर्धारित योजनाहरूमा लगानी भएको हो।