कोशी प्रदेश बनिरहेको छ जनमतको बलियो आधार

जनमत पार्टीले कोशी प्रदेशका सबै जिल्लामा संगठन विस्तारलाई तीव्रता दिएको छ। पार्टी अध्यक्ष डा. सी.के. राउतको नेतृत्वमा पछिल्ला दिनहरूमा पार्टी प्रवेश, समिति गठन, र जनसंपर्क कार्यक्रमहरू व्यापक रूपमा सञ्चालन भइरहेका छन्।

जनमत पार्टीका प्रदेश तथा जिल्ला संयोजकहरूको नेतृत्वमा स्थानीयस्तरमा नयाँ युवाहरू, बुद्धिजीवी, किसान, व्यवसायी तथा समाजसेवीहरू पार्टीमा आकर्षित हुन थालेका छन्। “हामी देशमा इमानदार, पारदर्शी र जनमुखी नेतृत्व दिन चाहन्छौं,” जनमत पार्टीका एक प्रदेश प्रतिनिधिले बताए।

पार्टीका अनुसार संगठन विस्तार अभियानअन्तर्गत हालसम्म प्रदेशका अधिकांश जिल्लामा नगर, गाउँपालिका र वडा तहसम्म समितिहरू गठन भइसकेका छन् भने बाँकी ठाउँहरूमा छिट्टै टुंगो लगाइनेछ।

डा. राउतको शान्तिपूर्ण आन्दोलन, शिक्षित पृष्ठभूमि र स्पष्ट दृष्टिकोणले पार्टीलाई वैकल्पिक मात्र नभई अबको आवश्यकता बनाउँदै लगेको समर्थकहरूको भनाइ छ। जनमत पार्टीले युवा पुस्ता, महिलाहरू, र गाउँगाउँमा रहेका नागरिकहरूलाई केन्द्रमा राखेर राजनीति गर्ने स्पष्ट नीति अघि सारेको छ।

जनमत पार्टीले अब देशको पूर्वी क्षेत्रमा मात्र नभई राष्ट्रिय तहमा समेत प्रभाव जमाउँदै लगेको देखिन्छ। संगठन विस्तार अभियानलाई सफल बनाउन विभिन्न जिल्लामा कार्यकर्ता परिचालन, भेटघाट कार्यक्रम र जनसुनुवाइहरूसमेत जारी छन्।