लोकतन्त्र दिवसमा एमालेको ‘यूथ सेलिब्रेशन’ कार्यक्रम

काठमाडौँ । नेकपा एमालेले युवालाई ‘जनताले जितेको दिन’ को स्मरण गराउने उद्देश्यले लोकतन्त्र दिवसका दिन वैशाख ११ गते बिहीबार ‘यूथ सेलिब्रेशन’ को आयोजना गर्दैछ । बुधवार पत्रकार सम्मेलन गर्दै आयोजक एमाले युवा सङ्घ नेपालका अध्यक्ष क्षितिज थेवेले ‘यूथ सेलिब्रेशन’ को सम्पूर्ण तयारी पुरा भएको जानकारी दिँदै १ लाख युवाहरू सहभागी हुने बताए ।

युवाले भविष्य निर्माणको सङ्कल्प गर्ने दिनको रूपमा वैशाख ११ गते भृकुटीमण्डपमा ‘यूथ सेलिब्रेशन’ समारोह आयोजना गर्न लागिएको अध्यक्ष थेबेको भनाइ छ ।  नयाँ पुस्तामा राजनीतिक परिवर्तनको महत्त्व स्थापित गर्ने योजना अन्तर्गत कार्यक्रम आयोजना गरिएकाले राष्ट्रव्यापी रूपमा युवाको सहभागिताका लागि त्यहाँ बहस हुने थेबेको भनाइ छ ।

भृकुटीमण्डपमा हुने युवा उत्सवमा प्रधानमन्त्री एवम् एमाले अध्यक्ष केपी शर्मा ओलीसमेत सहभागी हुनेछन् । कार्यक्रममा विभिन्न चर्चित कलाकार ब्यान्डको साङ्गीतिक प्रस्तुति, फोटो सेसन, टिकटक, लगायत युवाहरूलाई मनोरञ्जन दिन सकिने व्यवस्था मिलाएको एमालेले जनाएको छ ।

‘यूथ सेलिब्रेशन’ मा सहभागी हुन आउनेहरूका लागि टुँडिखेल, रङ्गशाला र बग्गीखाना नजिकै सवारी पार्किङ गर्ने व्यवस्था मिलाइएको एमालेले जनाएको छ । कार्यक्रममा युवाका ‘यूथ स्पिकर’ समेत प्रस्तुत गरिने एमालेले जनाएको छ ।