माघ दोस्रो सातादेखि सभापति कप फुटबल हुँदै

काठमाडौं । नेपाल लोकतान्त्रिक खेलकुद संघ महाधिवेशन निर्देशन समिति २०८१ को आयोजनामा ‘सभापति कप फुटबल’प्रतियोगिता हुने भएको छ ।

नेपाली कांग्रेससँग आवद्ध खेलकुद संघले माघ १० गतेदेखि १७ गतेसम्म काठमाडौंस्थित दशरथ रंगशालामा प्रतियोगिता आयोजना गर्ने भएको हो ।

प्रतियोगितामा ‘ए’ डिभिजन क्लबका ८ र आमन्त्रित २ विदेशी टोलीसहित १० पुरुष टोलीको सहभागिता रहेको आयोजक समितिका संयोजक मोहनबहादुर बस्नेतले बिहीबार कांग्रेस पार्टीको केन्द्रीय कार्यालयमा पत्रकार सम्मेलन गर्दै जानकारी गराएका हुन् ।

अखिल नेपाल फुटबल संघ (एन्फा)को प्राविधिक सहयोगमा हुने प्रतियोगिताको विजेताले २६ लाख र उपविजेताले १३ लाख नगद पुरस्कार प्राप्त गर्ने छन् ।

फुटबल प्रतियोगिता आयोजना गर्ने समितिले नै दुर्गादत्त जोशी स्मृति राष्ट्रिय तेक्वान्दो प्रतियोगिता माघ १८ गतेदेखि कैलालीको धनगढीमा आयोजना गर्ने भएको छ ।

३ दिने प्रतियोगिताको सिनियर र जुनियरतर्फ क्योरागीमा २० र पुम्सेमा ६ गरी २६ स्पर्धामा खेल हुनेछ ।
शीर्ष ३ स्थान हात पार्ने टिमले क्रमशः १ लाख, ५० हजार र २५ हजार नगद पुरस्कार पाउने समितिका सचिव पूर्णसिंह बोहराले जानकारी दिए ।

उत्कृष्ट पुरुष /महिला खेलाडी र निर्णायकलाई जनही १५ हजार नगदबाट पुरस्कृत गरिने छ । नेपाल तेक्वान्दो संघको प्राविधिक सहयोगमा हुने प्रतियोगिताको उदीयमान खेलाडीले ५ हजार नगद पुरस्कार प्राप्त गर्ने छन् ।

संयोजक बस्नेतले नेपालमा प्रजातन्त्र स्थापना गर्न योगदान दिएका विभिन्न स्वर्गीय व्यक्तित्वहरुको सम्मानमा विभिन्न खेलका प्रतियोगिता पनि आयोजना गर्ने बताए ।

यी प्रतियोगिताहरु भने नेपाल लोकतान्त्रिक खेलकुद संघले आयोजना गर्ने छ ।