अर्जुनधारा जलेश्वरधाममा ४२ औँ वार्षिक अनुष्ठानको भव्य तयारी

झापा । पूर्वको पशुपतिनाथका रूपमा ख्याति कमाएको अर्जुनधारा जलेश्वरधाममा ४२औँ वार्षिक अनुष्ठानको तयारी सम्पन्न भएको छ। धार्मिक, सामाजिक र सांस्कृतिक महत्वका विविध कार्यक्रमहरू समेटिएको यो अनुष्ठान मङ्सिर १ गतेदेखि ९ गतेसम्म सञ्चालन हुनेछ।

सन्त खडेबाबाको प्रेरणाबाट २०२३ सालमा स्थापना भएको अर्जुनधारा जलेश्वर धामले यस क्षेत्रमा धार्मिक पर्यटनको प्रवर्द्धन गर्दै आएको छ। यो धार्मिक स्थलले नेपालभित्रका भक्तजन मात्र होइन, भारत तथा अन्य देशका धार्मिक पर्यटकलाई पनि आकर्षित गरेको छ।

यस वर्षको अनुष्ठानको मुख्य आकर्षण श्रीमद्भागवत महापुराण पाठपारायण हो। कार्यक्रमलाई १०८ विद्वान आचार्यहरूले कथा वाचन गर्दै सञ्चालन गर्नेछन्। १०८ यजमानहरूले आफ्ना दिवङ्गत पितृहरूको उद्धारको लागि विशेष नामोच्चारण र पूजाआजा गर्नेछन्। यस्तै, ५१ जना वैदिक बटुकहरूद्वारा दैनिक रुद्राभिषेक र रजत महायज्ञ सञ्चालन गरिनेछ।

यस अवसरमा गुरुकुल अक्षयकोष र अन्न दान अक्षयकोष स्थापनाका लागि विशेष अभियान चलाइनेछ। भक्तजनलाई दान दिन प्रेरित गर्न अन्न दान, धनधान्याचल, र ताण्डव पाठ जस्ता कार्यक्रमको पनि आयोजना गरिएको छ।

कार्यक्रमको उद्घाटन भारतको दिल्ली निवासी सिद्ध योगी काली बाबाको बाहुलीबाट हुनेछ। यस्तै, अर्जुनधारा जलेश्वर धामका व्यासाचार्य तथा अन्तर्राष्ट्रिय कथा प्रवचनकर्ता श्री कुबेर सुवेदीको मुखारविन्दबाट सङ्गीतमय कथा प्रवचन सुनाइनेछ। नेपालका प्रतिष्ठित धर्माचार्यहरू र अन्य अतिथिहरूको समेत उपस्थिति रहने छ।

कार्यक्रमलाई सफल बनाउन विभिन्न विषयगत १९ वटा उपसमिति गठन गरिएका छन्। प्रचार(प्रसार उपसमितिका संयोजक नीरज कुमार ओलीले भक्तजनहरूलाई यो पवित्र अनुष्ठानमा सहभागी भई पुण्य लाभ आर्जन गर्न अनुरोध गरेका छन्। उनले विगत वर्षहरूमा जस्तै यस वर्ष पनि सञ्चार माध्यमहरूले धार्मिक अनुष्ठानको प्रचारमा सहकार्य गर्ने विश्वास व्यक्त गरे।