नेपाल–भारत सीमा नाकामा भारतीय एसएसबीले चलायो गोली

भारतीय भूमिमा पर्ने अहिरवा टोलाबाट एक समूहलाई लखेट्दै आएका एसएसबीका एक जवानले गोली चलाएको जनाइएको छ ।

मंगलबार दिउँसो चलेको गोलीकाण्डबाट कुनै किसिमको मानवीय क्षति नभएको पर्सा प्रहरीले जनाएको छ ।

प्रहरीका अनुसार नेपाल–भारतको सीमा नजिकैबाट एउटा गोलीको खोका बरामद भएको छ । बरामद भएको गोलीको उक्त खोका इन्सास राइफलको रहेको पर्सा प्रहरी प्रवक्ता दीपक भारतीले बताए ।

उनका अनुसार मितेरी पुल नजिकैबाट गोली बरामद त भएको छ  तर कसले र किन चलाएको भन्ने पुष्टि भएको छैन । घटनाबारे प्रहरीले सूक्ष्म अनुसन्धान गरिरहेको पर्सा प्रमुख कुमोध ढुंगेलले बताए । उनका अनुसार प्रहरीले अहिले विशेष टोली खटाएको छ ।