‘डाकिनी’ सीमित हलमा मात्र रिलिज हुने

काठमाडौँ । आगामी शुक्रबारबाट प्रदर्शनमा आउने फिल्म हो ‘डाकिनी’ । निर्माता कम्पनी षट्कोण आर्टस्ले फिल्म ५, ६ वटा हलमा मात्र रिलिज हुने जानकारी दिएको छ ।

मंगलबार आयोजित पत्रकार सम्मेलनमा फिल्मका निर्माता म्याक्स दिपेश खत्रीले फिल्मलाई व्यावसायिक प्रायोजनले भन्दा पनि चाहनेले हेर्न पाउन् भनेर रिलिज गर्न लागेको बताए । ‘हामीलाई फिल्मबाट कमर्सियल अपेक्षा छैन’, खत्रीले भने ‘आर्ट, अलि स्लो फिल्म मनपराउनेले हेर्न पाउन् भन्ने इच्छाले रिलिज गर्न लागेको हो ।’ उनले फिल्म धेरै अगाडि निर्माण भएपनि कोरोनाको कारण ५ वर्ष रिलिज ढिलो भएको सुनाए ।

फिल्मका निर्देशक खिन्से नोर्बु (जोङसार खिन्से रिम्पोछे) बौद्ध धर्मका ठूला गुरु समेत हुन् । रिम्पोछे अमेरिकादेखि नेपाल आउँदै छन् । उनको काठमाडौँ आगमनकै छेको पारेर फिल्मलाई रिलिज गर्न लागेको हो । फिल्म रिलिजसँगै रिम्पोछेको पर्यटन बोर्डमा ‘ब्यूटी इज अ ट्रयाप’ (सुन्दरता एउटा जाल हो) विषयमा मास्टरक्लास र बौद्धस्थित लिच्छवी हाउसमा ‘बुद्ध र भिखारी’ नाटक समेत मञ्चन हुने निर्माता खत्रीले जानकारी दिए ।