तामझामसाथ भर्ना अभियान, विद्यार्थी संख्या ओरालो गतिमा

सरकारले हरेक वर्ष लाखौं रुपैयाँ खर्च गरेर विद्यार्थी भर्ना अभियान सञ्चालन गर्दै आएको छ । अहिले त झन् स्थानीय तह र प्रदेश सरकारले समेत अभियानलाई प्राथमिकतामा राख्दै आएका छन् ।

सरकारहरू तामझामका साथ अभियान चलाइरहेका बेला त्यसको नतिजा भने निराशाजनक छ । महालेखापरीक्षकको ६० औं प्रतिवेदनले सामुदायिक विद्यालयमा विद्यार्थी संख्या घटिरहेको देखाएको छ । पछिल्लो ४ वर्षको अवधिमा सामुदायिक विद्यालयमा २०.१४ प्रतिशतले विद्यार्थी घटेको देखिएको छ ।

शैक्षिक सत्र २०७४ को तुलनामा २०७८ मा कुल विद्यार्थी संख्या ८.७७ प्रतिशतले घटेको हो । तीमध्ये सामुदायिक विद्यालयमा २०.१४ प्रतिशतले घटेका हुन् । निजी विद्यालयमा भने २०७४ को तुलनामा २०७८ मा ४७.५५ प्रतिशतले बढेको देखिएको छ । आधारभूत तहमा (कक्षा १ देखि ८ सम्म) कुल विद्यार्थी भर्ना संख्या बर्सेनि घट्दै गएको देखिएको हो ।