यसपटक प्रदेशको नाम राख्ने सांसदहरुको प्रतिबद्धता

विराटनगर । मंसिर ४ गतेको निर्वाचनबाट प्रदेशसभा सदस्य विजयी बनेका नेताहरुले यसपटक प्रदेशको नामकरण गर्ने प्रतिबद्धतना जनाएका छन् ।

सांसदहरुले शपथग्रहण गरिसकेका छन् । प्रदेशसभाको पहिलो बैठक आइतबार बसिसकेको छ ।

नवनिर्वाचित सांसदहरुका लागि दुई दिने अभिमुखीकरण कार्यक्रम आयोजना गरिएको थियो । उक्त कार्यक्रमको समापनका त्रममा सांसदरुले प्रदेशको नामाकरण चाँडै सर्वसम्मत रुपले गर्ने बताए ।

नेकपा एमालेका नेता बुद्धिकुमार राजभण्डारीले पहिलो कार्यकालमा प्रदेशले नाम पाउन नसक्दा पनि संघीयता विरोधीले प्रश्न उठाएको भन्दै उनले अब सबै दलहरुले सहमतिमा प्रदेशको नामकरण चाँडै गर्नुपर्ने बताए ।

नेपाली काँग्रेस संसदीय दलका नेता उद्धव थापाले प्रादेशिक संरचना गलत हैन भन्ने स्थापित गर्न प्रदेशसभाको चुनौति रहेको बताए । प्रभावकारी कानुन बनाउन र बनेका कानुन कार्यान्वयन गराउँदै सरकारको निगरानी गर्न सके प्रदेशमा विकासले फड्को मार्ने उनको भनाइ छ ।

माओवादी केन्द्रका नेता दुर्गाप्रसाद चापागाँईले निर्वाचित भएका सबै दलका सांसदहरुले ५ वर्ष चनाखो भएर काम गर्नसके प्रदेश गलत हो भन्नेहरु आफैं गलत साबित हुने बताए । प्रदेशको औचित्य सार्थक बनाउने चुनौति सामना गर्न परिवर्तनको लागि सहकार्य गरेका दलहरुबीचको सहकार्य आवश्यक हुनेमा उनको जोड छ ।

राप्रपा संसदीय दलका नेता भक्तिप्रसाद सिटौला, एकीकृत समाजवादीका नेता कमलप्रसाद जबेगु र जनता समाजवादीकी निर्मला लिम्बूले विकासका लागि सबै दलहरु एक हुनुको विकल्प नभएको बताए । नयाँनिर्वाचित ९३ जना सांसदहरुलाई विराटनगरमा भेला गरि प्रदेशसभा सचिवालयले अभिमुखीकरण गराएको थियो ।