म्यानमारकी नेतृ सुकीलाई थप ७ वर्ष जेल सजाय

काठमाडौं । म्यानमारको सैनिक अदालतले त्यहाँकी प्रजातन्त्रवादी नेतृ आङ सान सुकीलाई थप ७ वर्षको जेल सजाय सुनाएको छ । यसअघि सुनाइएकासहित गरी उनको कूल जेल सजाय अवधि ३३ वर्ष पुगेको छ ।

सेनाले प्रजातन्त्रिक सरकार अपदस्थ गरेसँगै नेतृ सुकी २०२१ देखि नजरबन्दमा थिइन् । त्यसयता उनीविरुद्ध १८ महिनामा १९ वटा आरोपमा मुद्दा चलाइएको छ ।

संयुक्त राष्ट्र सुरक्षा परिषद्ले गत हप्ता मात्रै उनको रिहाइको माग गरेको थियो । उनलाई पछिल्ला पाँच अभियोगमा शुक्रबार थप सजाय सुनाइएको त्यहाँका सञ्चार माध्यमले उल्लेख गरेका छन् ।

सरकारी मन्त्रीका लागि हेलिकप्टर भाडामा लिँदा नियम पालना नगरेको भन्दै अदालतले उनलाई भ्रष्टाचार गरेको ठहर गरेको थियो । सुकी यसअघि नै १४ विभिन्न मुद्दामा दोषी ठहर भइसकेकी छन् ।

उनीमाथि कोभिड सुरक्षा नियमहरूको उल्लंघन, वाकीटकीहरूको आयात र आधिकारिक गोप्य कानुनको मिचेको लगायतका आरोप लगाइएको छ ।

यसपटक उनको मुद्दाको सुनुवाइमा बन्द कोठामा भएको थियो । जहाँ जनता र मिडियाको पहुँचमा प्रतिबन्ध लगाइएको थियो । उनीहरूका वकिलहरूलाई पत्रकारहरूसँग बोल्नसमेत प्रतिबन्ध लगाइएको थियो ।

सुकीले भने आफूमाथि लागेका सबै आरोप अस्वीकार गर्दै आएकी छन् । ७७ वर्षीया उनी नोबेल शान्ति पुरस्कार विजेता प्रजातन्त्रवादी नेतृ हुन् ।