खानाका परिकारमा झुम्मिए एक्स्पो अवलोकनकर्ता

विराटनगर । विराटनगर–१४ स्थित डिग्री कलेजको मैदानमा आयोजना भइरहेको विराट एक्स्पोको तेस्रो दिन खानाका परिकारहरुमा अवलोकनकर्ताको आकर्षण बढेको छ ।

पुस ६ गतेसम्म सञ्चालन हुने ‘विराट एक्स्पो २०७९ कृषि तथा औद्योगिक अन्तर्राष्ट्रिय प्रदर्शनी’ मा बजारभन्दा केही सस्तोमा उपभोग्य वस्तु पाइएको अवलोकनकर्ताहरुले बताएका छन् ।

उनीहरुले विगतको एक्स्पोभन्दा फरक ढंगको रुपमा यस पटक एक्स्पो रहेको बताएका हुन् । यसअघिका एक्स्पोमा सामान किन्ने र बेच्नेको मात्रै भीड रहन्थ्यो । तर, यस पटक फरक किसिमका स्टल रहेको पाइएको विराटनगर–७ का अनिष अर्यालले बताए ।

एक्स्पोमा बजारको भन्दा उपभोग्य वस्तु सस्तो रहेको बताउँदै, अनिष अर्यालले भने, ‘विगतमा एक्स्पो (मेला)मा सामान खरिद बिक्रीका साथै रोटेपिङलगायतका खेल्ने हुन्थ्यो । यस पटक त्यो बाहेक नयाँ किसिमका योजनाहरुको स्टल रहेको पाएँ ।’

यहाँ व्यापार व्यवसाय गर्नका लागि आवश्यक परामर्शलगायत अन्य नयाँ व्यापार व्यवसायको सम्भावनाको क्षेत्र बुझाउनका लागि छुट्टै स्टल रहेको अर्यालले बताए ।

एक्स्पो कस्तो रहेछ भनेर हेर्न आएको बताउँदै, इटहरीबाट आएकी सिर्जना पोखरेलले भनिन्, ‘यस अघि लाग्दै आएको एक्स्पो र अहिलेको एक्स्पोमा धेरै फरक रहेको भेटाएँ । हामी गृहणीहरुको मुख्य आकर्षण नै दैनिक उपभोग्य वस्तु हो । त्यो बजारभन्दा सस्तो छ कि छैन भन्ने नै हुन्छ । यहाँ रहेको उपभोग्य वस्तु र घरमा प्रयोग हुने वस्तु बजारको भन्दा केही सस्तो रहेको पाएँ ।’

त्यसैगरी, एक्स्पोमा रहेको विभिन्न किसिममा खानाका स्टल पनि अवलोकनकर्ताहरुको अर्को आकर्षण रहेको छ । यहाँ स्थानीय स्वादका खानाहरु रहेकाले पनि त्यसको आकर्षण रहेको हो ।

एक्स्पोमा स्टल अवलोकनका अलवा दैनिक किसिमका विभिन्न छुट्टै कार्यक्रम हुने गरेको छ । शनिबार प्रदेश १ मा लगानीका सम्भावना र अवसरहरु तथा क्षेत्रीय सञ्जाल–सम्बन्ध र व्यापारिक अवसरको विषयमा विज्ञहरुले आ–आफ्नो कार्यपत्र प्रस्तुति गरेका थिए । त्यसैगरी, आइतबार प्रदेशको पर्यटन क्षेत्रमा लगानी सम्भावनाका बहुआयामिक पक्ष, पर्यटन प्रवद्र्धन के गर्ने के नगर्ने, पर्यटन प्रवद्र्धनमा मिडियाको भूमिका, बदलिँदो राजनीति र खस्कँदो अर्थतन्त्रमा युवा नेतृत्वको भूमिका विषयमा सम्बन्धित विज्ञहरुले कार्यपत्र प्रस्तुतिका साथै छलफल हुनेछ ।

दैनिक साँस्कृतिक कार्यक्रमका साथै राष्ट्रिय गायकहरुको प्रस्तुति रहने छ । आइतबार मिस्टर डि ¥यापरको प्रस्तुति रहने छ । महानगरको विभिन्न स्थानबाट एक्स्पो आउन जानका लागि सटल बस (निःशुल्क) को व्यवस्था गरिएको छ ।