पेट राम्ररी सफा हुँदैन ? यी उपाय काम लाग्न सक्छ

खानपानको खराब बानी, जङ्क र प्रशोधित खानेकुराको अत्यधिक उपभोगका साथै सुविधाभोगी जीवनशैलीका कारण पेटसम्बन्धी समस्याहरू सामान्य बन्दै गएका छन् । जसका कारण अधिकांशलाई बिहान पेट सफा गर्न समस्या हुन्छ ।

कब्जियत, अपच र खराब पाचनजस्ता पेटसम्बन्धी समस्याका कारण मानिसले पेट सफा गर्न पटक–पटक शौचालय जानुपर्छ । बारम्बार शौचालय जाँदा वा पेट सफा गर्न धेरै कन्नुपर्दा गुदद्वारलाई हानि पुग्न सक्छ । यही कारण कब्जियतबाट पीडित धेरैलाई पेट सफा गर्दा दिसामा रगतको समस्या देखिने गर्छ ।

पेटमा कब्जियतको समस्या गम्भीर छ भने यस्तो अवस्थाका व्यक्तिलाई चिकित्सककहाँ जान सल्लाह दिइन्छ । तर यदि जे पायो त्यही खाना खाँदा, केही मसालेदार खाना खाँदा, पेटमा ग्यास भरिँदा यस्तो समस्या देखिन्छ भने केही घरेलु उपायको मद्दतले तपाईं बिहान निकै सजिलै आफ्नो पेट सफा गर्न सक्नुहुन्छ ।

यहाँ हामी तपाईंलाई बिहान दिसा गर्न सजिलो हुने र राम्रोसँग पेट सफा गर्ने पाँच तरिकाबारे जानकारी दिँदै छौँ ।

तातो पानी पिउनुहोस्

बिहान उठ्नासाथ १ गिलास मनतातो पानी पिउनुभयो भने दिसा गर्न सजिलो बनाउँछ । यसका अन्य थुप्रै स्वास्थ्य लाभसमेत छन् । यसो गर्दा पाचनमा सुधार आउँछ, ग्यास–कब्जियतलाई हटाउँछ । तपाईंलाई मनपर्छ भने बिहान मनतातो पानीमा मह मिसाएर पिउन सक्नुहुन्छ, यसले स्वास्थ्यलाई अद्भूत फाइदा प्रदान गर्छ ।

जीरा पानी पिउनुहोस्

बिहान खाली पेटमा २५० मिलिलिटर पानीमा १ चम्चा जीरा उमालेर छानेर पिउनाले कब्जियतबाट राहत मिल्छ र दिसा गर्न सहज हुन्छ । यसले बिहान पेट सफा गर्न पनि मद्दत गर्छ ।

हर्बल चिया

यदि तपाईंले बिहान खाली पेटमा पुदिना, अदुवा, ग्रीन टी, सौफ, ज्वानो वा दालचिनी आदिको चिया सेवन गर्नुभयो भने पेट सफा गर्न यसले निकै फाइदा पुर्याउँछ । तपाईं चाहनुहुन्छ भने आफ्नो चियामा २–३ सामग्री हालेरसमेत पिउन सक्नुहुन्छ । मह र कागतीको रस मिसाएर पिउँदा पनि अत्यधिक फाइदा मिल्छ ।

ज्वानो पानी पिउनुहोस्

आधा चम्चा ज्वानोलाई २००-२५० एमएल पानीमा उमालेर छानेर मह वा गुड मिसाएर सेवन गर्नुहोस् । यसले कब्जियत हटाउँछ र पेट सफा गर्न मद्दत गर्छ ।

एप्पल साइडर भिनेगरको सेवन

बिहान उठेपछि मनतातो पानीमा २ चम्चा एप्पल साइडर भिनेगर मिसाएर सेवन गर्नुहोस् । यो कब्जियतको समस्याका लागि एउटा धेरै प्रभावकारी घरेलु उपाय हो । यसले पेटमा ग्यास र अपचको समस्यालाई हटाएर पाचन शक्तिलाई बलियो बनाउँछ । यसले तपाईंलाई दिसा गर्न र पेट सफा गर्न धेरै मद्दत गर्नेछ ।

(यो जानकारीमूलक लेख विभिन्न प्रयोग र अनुसन्धानपछि प्रकाशित विज्ञहरुको रिपोर्टका आधारमा तयार पारिएको हो ।)