मतदानको पूर्वनिर्धारित समय सकियो, मतदाता भने लाइनमै

विराटनगर । प्रतिनिधि तथा प्रदेशसभा सदस्य निर्वाचनको निर्धारित समय सकिको छ । निर्वाचन आयोगले बिहान ७ बजेदेखि साँझ ५ बजेसम्मको समय मतदानका लागि तोकेको थियो ।

देशका अधिकांश स्थानमा शान्तिपूर्ण रुपमा मतदान सम्पन्न भएको निर्वाचन आयोगले जनाएको छ । यद्यपि ५ बजेसम्म मतदान स्थलभित्र प्रवेश गरिसकेका मतदाताहरुले भने मतदान गर्न पाउने छन् ।

कतिपय मतदान केन्द्रमा मत खसाल्नका लागि अझैपनि मतदाता लाइनमै बसिरहेका छन् । केही मतदान केन्द्रमा मतदाताले मत हालिसक्दा निक्कै अबेर हुने अनुमान गरिएको छ । केही मतदानस्थलमा विवादका कारण रोकिएकाले ती स्थानमा मतदान गराउने प्रयास जारी छ ।

दोलखा, बाजुरा, सिरहा, नवलपरासी लगायतका स्थानमा मतदान रोकिएको छ । ती स्थानमा मतदान सुरु गराउन प्रयास भइरहेको निर्वाचन आयोगले जनाएको छ । केही ठाउँमा मतपत्र फरक पर्दा केहीबेर मतदान रोकिएको थियो ।

मतदान सम्पन्न भएका स्थानबाट मतपेटिका संकलनको काम जारी छ । प्रमुख निर्वाचन आयुक्त दिनेश कुमार थपलियाले आजै बेलुकादेखि मतगणना सुरु गर्ने जानकारी दिए ।

दुर्गम हिमाली क्षेत्रका जिल्लाबाट भने मतपेटिका संकलन गर्न समय लाग्ने भएकाले सोमबारदेखि मात्रै मतदान गर्ने तयारी आयोगले गरेको छ । दुर्गम स्थानका जिल्लाहरुमा हेलिकोप्टरबाट मतपेटिका संकलनको व्यवस्था मिलाइएको छ ।

मोरङका प्रमुख जिल्ला अधिकारी काशीराज दाहालले मतदान सम्पन्न भएका ठाउँको मतपेटिका संकलनको काम भइरहेको जानकारी दिए । ‘केही मतदान केन्द्रमा अझैपनि मतदाता लाइनमा छन् । लाइनमा रहेकालाई मतदान गर्न दिइने छ,’ उनले भने, ‘मतदान सकिएका ठाउँमा भने मतपेटिका संकलनको काम थालिएको छ । संकलनपछि मतपेटिका सुरक्षितसाथ गणनास्थलमा ल्याइने छ ।’