राधाकृष्ण रथयात्रा समारोह समितिका अध्यक्ष कैलाश रेग्मीका अनुसार, यसपालि बन्ने रथको आकार र नापमा महत्वपूर्ण परिवर्तन गरिएको छ।
मुख्य मन्दिर: १० फिट चौडाइ र १० फिट लम्बाइको हुनेछ।उचाइ: पहिलेको १८ फुटबाट बढाएर २१.३ फुटको बनाइँदैछ।
चौडाइ: पहिलेको १२ फुटबाट दुई फुट बढाएर १४ फुटको बनाइनेछ।मूल रथको लम्बाइ: १६ फुटबाट बढाएर १९ फुटको बन्नेछ।
यसअघिको रथको संरचना २०२५ सालमा बनेको थियो। नयाँ संरचना निर्माण गर्दा पुरानो रथका केही सामग्रीहरूलाई पनि कलात्मक रूपमा प्रयोग गरिनेछ। रथ यसअघि जस्तै प्यागोडा शैलीमै निर्माण भइरहेको छ।
साउन ३१ गते कृष्ण जन्माष्टमी परेको छ। सोही दिन राधाकृष्ण मन्दिरमा विशेष पूजा आराधना गरिनेछ। त्यसको भोलिपल्ट भाद्र १ गते दिउँसो रथयात्रा निकालिनेछ।
रथयात्रामा विभिन्न गाडी र साना रथहरूसहित करिब ६० वटा झाँकी रहने अध्यक्ष रेग्मीले बताए। ती झाँकीहरूमा भजन–कीर्तन समूहहरू, विभिन्न धार्मिक झाँकीहरू र प्रस्तुतिहरू समावेश हुनेछन्।
रथयात्रा दिउँसो साढे ३ देखि ४ बजेसम्ममा राधाकृष्ण मन्दिरबाट सुरु हुनेछ। यसको मार्ग निम्नानुसार छ:
राधाकृष्ण मन्दिरबाट सुरु।
विराटनगरको मेन रोड हुँदै ट्राफिक चोक र रोडशेष चोक।
कोशी राजमार्ग हुँदै जनआन्दोलन चोक, भृकुटी चोक भएर बरगाछी।
बरगाछीबाट रथयात्रा पूर्वतिर लाग्दै दुर्गाचोक हुँदै पुनः राधाकृष्ण मन्दिरमै पुगेर समापन हुनेछ।
करिब १० किलोमिटरको यो रथयात्राको अवधि लगभग ५ घण्टाको रहने अनुमान गरिएको छ। साँझ करिब साढे ८ बजे राधाकृष्ण मन्दिर पुगेर यात्रा टुङ्गिनेछ।
रथयात्राको तयारीका लागि १००१ सदस्यीय मूल समिति गठन गरिएको छ भने समितिअन्तर्गत विभिन्न १९ वटा उपसमितिहरू पनि बनाइएको अध्यक्ष रेग्मीले जानकारी दिए।
विराटनगरमा हालको स्वरूपको रथयात्रा २०२४ सालदेखि गरिँदै आएको छ। त्यसअघि वि.सं. १९८८ तिर सानो खटमा भगवान कृष्ण र राधाको मूर्ति राखेर नगर परिक्रमा गराउने प्रचलन थियो।
यो भव्य धार्मिक उत्सवमा सहभागी हुन नेपाल र भारतका विभिन्न क्षेत्रबाट ठूलो संख्यामा श्रद्धालुहरू भेला हुने गर्दछन्। रथलाई डोरीले तानेर नगर परिक्रमा गराउने चलन रहेको यो अवसरमा सुरक्षा व्यवस्था सुदृढ बनाउन ठूलो संख्यामा सुरक्षाकर्मी परिचालन गरिने बताइएको छ।
Like us on Facebook
Follow us on Instagram
Subscribe YouTube Channel
Follow us on Tiktok