देशभर मनसुनी प्रभाव: गण्डकीका पहाडी भूभागमा भारी वर्षाको सम्भावना

हाल देशभर मनसुनी वायुको प्रभाव रहेको मौसम पूर्वानुमान महाशाखाले जनाएको छ। मनसुनको न्यून चापीय रेखा सरदर स्थानको आसपासमा अवस्थित छ।

यसको प्रभावले अहिले बागमती, गण्डकी, कर्णाली र सुदूरपश्चिम प्रदेशमा सामान्य बदली छ भने बाँकी प्रदेशमा आंशिक बदली रहेको छ। कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा हल्का वर्षा भइरहेको छ।

आज दिउँसो देशभर सामान्य बदली रहनेछ। सुदूरपश्चिम प्रदेशसहित देशका पहाडी भूभागका धेरै स्थानमा र बाँकी तराईका केही स्थानमा चट्याङसहित मध्यम वर्षाको सम्भावना छ।

आज राति देशको पहाडी भूभागमा सामान्य बदली रही तराई भूभागमा आंशिक बदली रहनेछ। पहाडी भूभागका केही स्थानमा तथा तराईका एक-दुई स्थानमा चट्याङसहित मध्यम वर्षाको सम्भावना छ। विशेष गरी गण्डकी प्रदेशका पहाडी भूभागका एक-दुई स्थानमा भारी वर्षाको पनि सम्भावना रहेकाले आवश्यक सतर्कता अपनाउन महाशाखाले अनुरोध गरेको छ।