मोरङ र सुनसरीबाट लागू औषधसहित ६ जना पक्राउ

विराटनगर । मोरङ र सुनसरी जिल्लाका विभिन्न स्थानबाट साउन ०८ गते प्रहरीले लागू औषधसहित ६ जनालाई पक्राउ गरेको छ। सुनसरीको इनरुवा नगरपालिका-४, बसपार्कमा जिल्ला प्रहरी कार्यालय सुनसरी र अस्थायी प्रहरी पोष्ट बसपार्कबाट खटिएको टोलीले को.१ ह ८९८८ नम्बरको अटो रिक्सामा जाँच गर्ने क्रममा धरान-६ का एक बालकसहित २४ वर्षीय युवराज लिम्बु र अटो चालक धरान-८ का २८ वर्षीय निलन लिम्बुलाई नियन्त्रणमा लिएको छ। उनीहरूको साथबाट ३ ग्राम ८६ मिलिग्राम ब्राउन सुगर बरामद भएको छ।

यसैगरी, इलाका प्रहरी कार्यालय धरानले धरान-१४ का ५२ वर्षीय कुमार बस्नेतलाई उनको कोठाबाट ५ सय ७६ ट्याब्लेट स्पास्मो प्रोक्सिवनसहित पक्राउ गरेको छ।

मोरङतर्फ, इलाका प्रहरी कार्यालय उर्लाबारीले रतुवामाई नगरपालिका-६ का २९ वर्षीय मनोज कार्कीलाई ३ सय ८० मिलिग्राम ब्राउन सुगरसहित नियन्त्रणमा लिएको छ। वडा प्रहरी कार्यालय विराटनगरले भने विराटनगर महानगरपालिका-९ का ३३ वर्षीय विकास कुमार साहलाई ३७ मिलिग्राम ब्राउन सुगरसहित पक्राउ गरेको छ।

लागू औषधसहित पक्राउ परेका सबैमाथि थप अनुसन्धान भइरहेको प्रहरीले जनाएको छ।