एसईईको जीपीएका आधारमा विद्यार्थी छनोट
सीटीईभीटीले एसईईको ग्रेडिङ प्रणालीलाई वैज्ञानिक र पारदर्शी मान्दै अब जीपीएकै आधारमा विद्यार्थी छनोट गर्ने निर्णय गरेको छ। यो निर्णयसँगै देशभरका इच्छुक विद्यार्थीहरूलाई प्रवेश परीक्षाका लागि काठमाडौं धाउनुपर्ने बाध्यता हटेको छ।नीति परिवर्तनको कारण
सीटीईभीटीका सूचना अधिकारी एकराज अधिकारीका अनुसार यसअघि हरेक वर्ष प्रवेश परीक्षाबाट मात्र भर्ना लिइन्थ्यो। तर, पछिल्लो समय केही प्राविधिक कार्यक्रममा विद्यार्थीको आकर्षण घट्दै गएको छ। नर्सिङ, स्वास्थ्य सहायक (एचए), र फार्मेसीबाहेकका कार्यक्रममा सिट खाली हुन थालेपछि सीटीईभीटीले प्रवेश परीक्षाको नीति परिवर्तन गरेको हो। अधिकारीका अनुसार “कतिपय कार्यक्रममा तोकिएको कोटाभन्दा पनि कम विद्यार्थी सहभागी हुन थालेपछि प्रवेश परीक्षाको औचित्यमै प्रश्न उठ्न थाल्यो।” ४८ कोटा भएको कार्यक्रममा ४० मात्र विद्यार्थी आएपछि नयाँ नीति अपनाइएको उनले बताए।एसईई र प्रवेश परीक्षाको समानता
अधिकारीका अनुसार प्रवेश परीक्षामा सोधिने प्रश्न पनि गणित, विज्ञान र अंग्रेजीमै केन्द्रित हुने भएकाले भर्खर एसईई दिएका विद्यार्थीको स्थायी मूल्यांकनलाई नै आधार बनाउने निर्णय गरिएको हो। “तीन घण्टाको हाम्रो प्रवेश परीक्षा र एसईईको तीन-तीन घण्टाको मूल मूल्यांकनमा फरक छैन,” उनले थपे।
सरकारको नीति तथा कार्यक्रमको आधार
यो निर्णय नेपाल सरकारको चालु आर्थिक वर्ष २०८२/८३ को नीति तथा कार्यक्रमसँग सम्बन्धित छ। उक्त नीति तथा कार्यक्रमको ६४औँ बुँदामा “विद्यालय शिक्षा पूरा गर्नासाथ विद्यार्थीको ग्रेडिङको आधारमा प्राविधिक तथा व्यवसायिक वा विश्वविद्यालय शिक्षामा प्रवेश गराइने छ” भनिएको छ।
अनलाइन आवेदनको व्यवस्था
परिषद्ले जीपीए प्रणालीलाई प्रयोगमा ल्याउँदै अब विद्यार्थीले जीपीएका आधारमा अनलाइन आवेदन दिई भर्ना प्रक्रिया अघि बढाउन सक्ने व्यवस्था मिलाएको छ। यसले विद्यार्थीहरूलाई थप सहज हुने अपेक्षा गरिएको छ।
Like us on Facebook
Follow us on Instagram
Subscribe YouTube Channel
Follow us on Tiktok