आर्या न्युरोमा टाउको र मेरुदण्ड चोटका विपन्न बिरामीलाई १ लाखसम्मको निःशुल्क उपचार

विराटनगर । विराटनगर–३, कंचनवारीमा अवस्थित आर्या न्युरो हस्पिटलले दुर्घटनाका कारण टाउको तथा मेरुदण्डमा गम्भीर चोट लागेका विपन्न वर्गका बिरामीहरूलाई १ लाख रुपैयाँसम्मको निःशुल्क उपचार सेवा प्रदान गर्दै आएको छ। नेपाल सरकारको स्वास्थ्य तथा जनसंख्या मन्त्रालयअन्तर्गत लागू भएको “विपन्न नागरिक औषधी उपचार कार्यक्रम निर्देशिका २०८०” अनुसार हस्पिटलले यो सेवा संचालनमा ल्याएको हो। अस्पताल प्रशासनका अनुसार मुख्यतः विपन्न वर्गका बिरामीलाई लक्षित गरी कार्यक्रम अघि बढाइएको छ। दुर्घटनामा परेर टाउको वा मेरुदण्डमा चोटपटक लागेका, रुख वा उचाइबाट लडेर गम्भीर अवस्थामा पुगेका बिरामीहरूले यस सेवाको लाभ लिन सक्नेछन्।

निःशुल्क उपचार सेवा पाउनका लागि केही आवश्यक कागजातहरू पेश गर्नुपर्नेछ:

•अस्पतालको ओपिडी वा इमर्जेन्सी कक्षबाट चिकित्सकले हेरेको प्रमाण–पुर्जा,

•बिरामीको स्थायी वसोवास रहेको गाउँपालिका वा नगरपालिकाबाट प्राप्त विपन्न नागरिक सिफारिस,

•बिरामीको नेपाली नागरिकताको प्रतिलिपि।

हस्पिटलका अनुसार, कार्यक्रममार्फत वास्तविक रूपमा आर्थिक रूपमा कमजोर बिरामीहरूले जीवनरक्षक उपचार निःशुल्क रूपमा पाउनेछन्।