विद्यालय बन्द गरेर अपी हिमाल गाउँपालिकाका शिक्षक–विद्यार्थी लेकतिर लागे यर्सा संकलन गर्न

काठमाण्डौं । दार्चुलाको अपी हिमाल गाउँपालिकाका शिक्षक–विद्यार्थी लेकतिर गएपछि विद्यालय बन्द गरिएका छन् । यार्सागुम्बा सङ्कलनका लागि गाउँपालिका क्षेत्रका शिक्षक, अभिभावक र विद्यार्थी लेक गएपछि विद्यालय बन्द गरिएका हुन् । अपी गाउँपालिकाको शिक्षा शाखाका अधिकृत वीरेन्द्रसिंह साउदले यार्सा सङ्कलनको याम शुरू भएकाले गएको जेठ ४ गतेदेखि पालिकाभरिका विद्यालय २० दिनका लागि बन्द गरिएको जानकारी दिनुभयो । बर्खे बिदाबाट मिलान गर्नेगरी अहिले विद्यालय बन्द गरिएका र यही जेठ २४ गते खुला हुने उहाँले जानकारी दिनुभयो । जडीबुटी सङ्कलन गर्ने याम भएकाले हरेक वर्ष यो बेला धेरैजसाे विद्यालय बन्द हुने गरेका छन् ।