विद्युत प्राधिकरण नेतृत्वलाई स्वागत गर्दै मोरङ–सुनसरी औद्योगिक कोरिडोरको समस्या उठाइयो

विराटनगर । आज (बिहीबार) मोरङ उद्योग व्यापार संघ र नेपाल उद्योग परिसंघ, कोशी प्रदेशको संयुक्त आयोजनामा नेपाल विद्युत प्राधिकरणका उच्च पदस्थ अधिकारीहरूसँग विशेष भेटघाट तथा अन्तरक्रिया कार्यक्रम सम्पन्न भएको छ। संघको कार्यालयमा आयोजित कार्यक्रममा नेपाल विद्युत प्राधिकरणका कार्यकारी निर्देशक हितेन्द्र देव शाक्य, उप–निर्देशक श्री दिर्घायु श्रेष्ठ, कोशी प्रदेश प्रमुख निर्देशक राजीव सिंह तथा विराटनगर वितरण शाखा प्रमुख सरोज कुमार साहलाई औपचारिक स्वागत गरिएको थियो । कार्यक्रममा मोरङ उद्योग व्यापार संघका अध्यक्ष अनुपम राठी र नेपाल उद्योग परिसंघ, कोशी प्रदेशका अध्यक्ष पवन कुमार सारडाले संयुक्त रूपमा स्वागत मन्तव्य राख्दै मोरङ–सुनसरी औद्योगिक कोरिडोरमा भइरहेका विद्युतसम्बन्धी समस्या तथा चुनौतीहरूबारे जानकारी गराउनु भयो ।

संघका सचिव अमित सारडाको सञ्चालनमा सम्पन्न उक्त कार्यक्रममा नेपाल उद्योग परिसंघका केन्द्रीय उपाध्यक्ष भीम घिमिरे, संघका पूर्व अध्यक्ष तथा परिसंघ कोशी प्रदेशका वरिष्ठ उपाध्यक्ष प्रकाश मून्दडा लगायतका पदाधिकारीहरूको उल्लेख्य उपस्थिति रहेको थियो।

कार्यक्रममा नेपाल विद्युत प्राधिकरण विराटनगरका अधिकारीहरू, संघ तथा परिसंघका कार्यसमिति सदस्यहरू, युवा र महिला उद्यम समिति संयोजक तथा सदस्यहरू, उद्योग प्रतिष्ठानका प्रतिनिधिहरू र सञ्चारकर्मीहरूको समेत सक्रिय सहभागिता थियो।

कार्यक्रमले उद्योग क्षेत्रको विद्युत समस्या समाधानमा प्राधिकरणसँग सहकार्य गर्दै दीर्घकालीन समाधानको पहल आवश्यक रहेको सन्देश दिएको छ।