विराटनगर । मोरङको उर्लाबारीमा चिनी मिलबाट निस्किएको छुवा बोकेको ट्यांकरले ठक्कर दिँदा मोटरसाइकल चालकको मृत्यु भएको छ ।

पूर्व–पश्चिम राजमार्गअन्तर्गत उर्लाबारी नगरपालिका–३ पुरानो मंगलबारेमा बिहीबार राति ११स्१५ बजेतिर दुर्घटना भएको हो । पश्चिमतर्फ आउँदै गरेको ग ६ प ५०२६ नम्बरको मोटरसाइकललाई विपरीत दिशातर्फ जाँदै गरेको ना ५ ख २१८७ नम्बरको ट्यांकरले ठक्कर दिएको मोरङ प्रहरीका प्रवक्ता डीएसपी वेदप्रकाश जोशीले बताउनुभयो।

उहाँका अनुसार दुर्घटनामा परेर मोटरसाइकल चालक झापाको दमक नगरपालिका–९ का ३६ वर्षीय मनकुमार लिम्बूको मृत्यु भएको छ । ट्यांकरले मोटरसाइकललाई ठक्कर दिएपछि गम्भीर घाइते हुनुभएका उहाँको उपचारका क्रममा शुक्रबार बिहानका राति १ः३५ बजेतिर झापाको बिर्तामोडस्थित बी एन्ड सी अस्पतालमा मृत्यु भएको डीएसपी जोशीले जानाकारी दिनुभयो ।

उर्लाबारीकै मदन भण्डारी अस्पताल एवं ट्रमा सेन्टरमा सम्भव नभएपछि लिम्बूलाई थप उपचारका लागि बी एन्ड सी लगिएको थियो । ट्यांकर र चालक बाराको जीतपुरसिमरा उपमहानगरपालिका–२२ का २९ वर्षीय अशोक थोकरलाई प्रहरीले नियन्त्रणमा लिएको छ ।

सीसी क्यामेरा फुटेजमा मोटरसाइकल र ट्यांकर एकआपसमा ठोक्किएको देखिन्छ । इलाका प्रहरी कार्यालय उर्लाबारीका इन्स्पेक्टर रन्जन बराल नेतृत्वको टोलीले घटनाको थप अनुसन्धान गरिरहेको छ ।
35
Shares
२ जेष्ठ २०८२, शुक्रबार १९:४५