परिणाममुखी नीति बनाउन माओवादीको सुझाव

विराटनगर । काेशी प्रदेश सरकारलाई परिणाममुखी बजेट निर्माण गर्न नेकपा माओवादी केन्द्र कोशी प्रदेश संसदीय दलले सुझाव दिएकाे छ । मंगलबार मुख्यमन्त्री हिक्मतकुमार कार्कीलाई भेटेर माओवादी केन्द्रले परिणामुखी नीति तथा कार्यक्रम बनाउन सुझाव दिएको हो । नीति तथा कार्यक्रम निर्माणकाे तयारीमा रहेका मुख्यमन्त्री कार्कीले प्रमुख प्रतिपक्षी दल माओवादी केन्द्रका नेताहरुलाई छलफलका लागि बाेलाउनु भएको थियो । माओवादी केन्द्र संसदीय दलका नेता इन्द्रबहादुर आङ्बोले उद्यमशीलता,उत्पादन र रोजगारीलाई केन्द्रमा राखेर नीति कार्यक्रम निर्माण गर्न  सुझाव दिएको बताउनुभयो।  

माओवादी केन्द्रले युवाहरूलाई उद्यमशील बनाउने ,आइटी क्षेत्रलाई बिशेष प्राथमिकता दिने, १४ वटा नमुना आवासीय विद्यालय निर्माण गर्ने, प्रदेश मातहतको अस्पतालको पुर्वाधार, स्वास्थ्य उपकरण,जनशक्तिको गुणात्मक सुधार गर्ने, बसाइँसराई रोक्न पहाड र ग्रामीण क्षेत्र केन्द्रीत विशेष प्याकेज निर्माण गर्न सुझाव दिएको छ ।

रुग्ण र अलपत्र आयोजनालाई प्राथमिकतामा राखेर सम्पन्न गर्ने, प्रदेशका ५६ वटा निर्वाचन क्षेत्रका शिक्षा, स्वास्थ्य, खानेपानी,सिंचाइ र सडकलाई प्राथमिकता राख्न सुझाव दिएको हो । त्यस्तै कृषिमा प्रोजेक्ट ऋण,स्टार्टअप ऋण, कृषि उत्पादन र प्रशाेधन र बजारीकरणमा सहयोग गर्ने नीति बनाउन सुझाव दिएको छ ।