मिल्स क्रिकेट मैदानमा भएको खेलमा टस जितेर ब्याटिङ गरेको होराइजनको टोली २० ओभरमा १ सय ४२ रनमा समेटिएको थियो । होराइजनका लागि सन्तोष कार्कीले सर्वाधिक ३८ रन बनाए। १४ बलको सामना गरेका कार्कीले ४ छक्का र ३ चौका प्रहार गरेका थिए । त्यसैगरी क्रिजमा कपिल मण्डलले २७ र अमन अलीले २३ रन जोडे ।
आयोजक मिल्सका लागि मुरली चौधरी ४ ओभरमा ३८ रन खर्चेर ४ विकेट लिए । होराइजनले प्रस्तुत गरेको १ सय ४२ रनका लक्ष्य पछ्याउने क्रममा आयोजक मिल्सको टोली १५ ओभरमा ९७ रनमा समेटियो। क्वाटरफाइनलबाट पराजित हुदै प्रतियोगिताबाट बाहिरिएको मिल्सका लागि लक्ष्य पछ्याउने क्रममा सार्थक धितालले २५ रन बनाए ।
त्यसैगरी राहुल विकले २४ र सन्तोष चौधरीले २१ रनको योगदान दिए । जित हात पारेको होराइजनका लागि दिपेश कँडेलले ४ ओभरमा १७ रन दिदैं ४ विकेट आफ्नो खातामा दर्ता गराएका थिए ।
होराइजनले बुधबार हुने सेमीफाइनलमा भारतको हाइपर क्रिकेट क्लब पटनासँग स्पर्धा गर्नेछ ।
त्यसैगरी आजै भएको दोस्रो खेलमा सिद्धार्थ क्रिकेट क्लब विराटनगरले भारतको मुन क्रिकेट क्लब सुपौललाई ६ विकेटले पराजित गर्दै सेमीफाइनलको यात्रा तय गरेको हो । टस जितेर ब्याटिङ गरेको मुन क्रिकेट क्लब सुपौलले २० ओभरमा ९ विकेटको क्षतिमा १ सय ३१ रनका मध्यम योगफल बनाएको थियो। मुनका लागि कमलुद्दिनले २५, र प्रेमकुमारले अविजित २४ रन बनाए ।
सिद्धार्थका लागि नितेश यादवले ४ ओभरमा १९ रन दिदैं ३ विकेट लिए । लक्ष्य पछ्याएको सिद्धार्थको टोलीले १४ दशमलव १ ओभरमा ४ विकेटको क्षतिमा १ सय ३२ रन बनाएको थियो । सिद्धार्थका लागि पप्पु यादव बीले विष्फोटक ब्याटिग गर्दै ५२ रन बनाए ।
२९ बलको सामना गर्दै अर्धशतक पुरा गरेका यादवले ५ छक्का र ४ चौका प्रहार गरेका थिए । त्यसैगरी अर्का ब्याट्सम्यान रोशनले ३२ रन बनाए । पराजित हुदै घर फर्किएको मुनका लागि गुलशन राजले २ विकेट लिए । जित हात पारेको सिद्धार्थले अन्तिम क्वाटरफाइनलमा प्रतिस्पर्धा गर्ने सिरहा क्रिकेट क्लब र विराटनगरको वाइआरसीसीबीचको विजेता टोलीसँग सेमिफाइनलमा खेल्नेछ ।
Like us on Facebook
Follow us on Instagram
Subscribe YouTube Channel
Follow us on Tiktok