एमाले मोरङ अधिवेशन : फेरि सर्याे मतदान

विराटनगर । नेकपा (एमाले) मोरङको नयाँ नेतृत्व चयनका लागि हुनुपर्ने मतदान फेरि सरेको छ । पार्टीको १० औं जिल्ला अधिवेशनमा नयाँ नेतृत्व चयनका लागि आज (मंगलबार) हुने भनिएको मतदान भोलि (बुधबार) बिहानसम्मका लागि सरेको हो ।

यसअघि निर्वाचन समितिले मंगलबार बिहान ९ बजेबाट मतदान सुरु गर्ने बताएको थियो । सहमतिको प्रयास गर्ने भन्दै पुनः दिउँसोका लागि सारियो । मतपत्र छपाइमा समय लाग्ने भन्दै निर्वाचन समितिले मतदानको समय सारेको हो । समितिका अनुसार बुधबार बिहान ७ बजेबाट विराटनगरको होटल मनास्लु इनमा मतदान सुरु हुने छ ।

पार्टीको जिल्ला अधिवेशन त्यही होटलमा फागुन १७ गतेदेखि चलिरहेको छ । प्रमुख निर्वाचन अधिकृत सुरेशलाल श्रेष्ठले मतदानको समय बुधबार बिहान ७ बजेदेखि अपरान्ह ४ बजेसम्मका लागि छुट्याइएको बताए । उनका अनुसार ५ जना पदाधिकारीसहित १ सय ६५ सदस्यीय जिल्ला समितिमा ७१ जना सदस्य सर्वसम्मत निर्वाचित भएका छन् ।