‘पाथीभरामा नो केवलकार आन्दोलन’ प्रति जसपा नेपालको साथ / गोली प्रहारको घटनामा सामजिक अभियान्ता देखि मेयरको पनि आपत्ति

विराटनगर । जनता समाजवादी पार्टी नेपालले पाथीभरा क्षेत्रमा पहिचान पक्षधरको ‘नो केवलकार आन्दोलन’ का आन्दोलनकारीमाथि प्रहरी प्रशासनले अन्धाधुन्ध गोली प्रहार गरेको विषयमा आपत्ति जनाएको छ । जसपा नेपालका प्रवक्ता मनिष कुमार सुमनले आज एक विज्ञप्ती जारी गर्दै प्रहरीको गोली लागी घाइते भएकाहरु यमबहादुर लिम्बु, सगुन लावती, धर्मान पालुङ्वालगायत घाइते भएको उल्लेख गर्दै शान्तिपूर्ण आन्दोलनको तयारी गर्दा राज्यले मान्छे ताकेरै गोली प्रहार गर्नु अत्यन्तै निन्दनीय तथा भत्र्सनायोग्य भएको बताएका छन् । जसपा, नेपालले आन्दोलनकारीको मागअनुसार उक्त क्षेत्रमा केवलकार निर्माण कार्य अविलम्ब बन्द गरी आन्दोलनकारी माथिको प्रहरी दमन तत्काल रोक्न माग गरेको छ ।

देशका महत्वपुर्ण पदमा बसेका तथा सामाजिक अभियन्ता र सामाजिक सञ्जालमा‌ पनि पाथिभरा केबलकार निर्माणको बिषयमा सरकार र निर्माण पक्षको चर्को विरोध भइरहेको छ ।

धरान उपमहानगरपालिकाका मेयर हर्क साम्पाङले यस बिषयमा संवाद र सहमति खोजेर अगाडि बढ्नु पर्ने र सरकारले आन्दोलनकारी प्रति गरेको दमन लोकतान्त्र बिरुद्द भएको  बताइएका छन् ।  ‘मुकुम्लुङ काण्डमा गोली हान्ने प्रहरी होइन ! गोली हान्न आदेश दिने यो सरकार हो ! लोकतन्त्रमा यो घटनाको चौतर्फी विरोध हुनु पर्दछ !  सम्बाद र सहमति खोजौँ ! झगडा र लफडा नरोजौँ !’,मेयर साम्पाङ्गले फेसबुकमा लेखेका छन् ।

यस्तै, सामजिक अभियान्ता हेमराज थापाले पनि पाथिभरा जस्तो धार्मिक क्षेत्र‌ ब्यापारीको हात सरकारले सुम्पेको आरोप लगाएका छन् । उनी सामजिक सञ्जाल फेसबुकमा लेख्छन् , ‘पाथिभरा जस्तो धार्मिक क्षेत्र एक जना ब्यापारिलाई ब्यापार गर्न ठेक्कामा दिन्छ सरकार । अनि स्थानियले  यस्तो गर्नु हुदैन भनेर आवाज उठाउँदा दुई जनालाई गोलि ठोकेर घाइते बनाएछ। सार्बजनिक सम्पति लुटेर खाने कार्य जारि छ।’

त्यसैगरी, अधिकांश सामाजिक सञ्जाल प्रयोगकर्ताहरुले पनि नो केबलकार आन्दोलनलाई साथ दिएका छन् ।