काेशीमा व्यवसाय विकास सेवाका लागि सम्झौता

विराटनगर । साना, मझौला व्यवसायलाई सहयोग गर्ने उदेश्यले विराटनगरमा ‘व्यवसाय विकास सेवा’ सम्झौतामा हस्ताक्षर भएको छ । शुक्रबार नेपाल उद्योग वाणिज्य महासंघ कोशी, आध्यान्त फण्ड मेनेजमेन्ट लि. र उपाय बिजनेश सोलुशन र नेपाल उद्योग वाणिज्य महासंघ कोशी, आध्यान्त फण्ड मेनेजमेन्ट लि. र डाइनो टेक प्रा.लि. बीच दुई बेग्ला बेग्लै सम्झौता भएको हो ।

उपाय बिजनेश सोलुशन बीचको सम्झौतामा महासंघ कोशीका अध्यक्ष राजेन्द्र राउत, आध्यान्त फण्ड मेनेजमेन्ट लि.का कार्यक्रम तथा साझेदारी प्रमुख निश्चलसिंह भण्डारी र उपाय बिजनेश सोलुशनका प्रमुख कार्यकारी अधिकृत शोभा श्रेष्ठ तथा डाइनो टेक प्रा.लि. बीचको सम्झौतामा महासंघ कोशीका अध्यक्ष राजेन्द्र राउत, आध्यान्त फण्ड मेनेजमेन्ट लि.का कार्यक्रम तथा साझेदारी प्रमुख निश्चलसिंह भण्डारी र डाइनो टेक प्रा.लि.का अध्यक्ष प्रदिप सिग्देलले हस्ताक्षर गरेका हुन् ।

सम्झौता अघि बिडिएसबारे चर्चा गरिएको थियो । महासंघ प्रदेश अध्यक्ष राउतले नेपालको आर्थिक विकासका लागि कोशी प्रदेशको भूमिका महत्वपूर्ण रहेको उल्लेख गर्दै व्यवसाय विकास सेवा शुभारम्भ भएकामा खुसी व्यक्त गरे । कोशी प्रदेशमा १२ हजार २२५ उद्योग प्रतिष्ठान सञ्चालनमा रहेको र तिनमा ७३ हजार ९१८ जनाले रोजगारी पाएको राउतले जानकारी दिए । यो तथ्यांक औपचारिक रुपमा सञ्चालनमा रहेका उद्योग, प्रतिष्ठानहरुको भएको उल्लेख गर्दै उनले अनौपचारिक क्षेत्रमा पनि उल्लेख्य रोजगारी सृजना भएको बताए ।

ग्रामीण क्षेत्रदेखि सहरी क्षेत्रसम्म सञ्चालनमा रहेका घरेलु तथा साना उद्योगहरु, उद्योग स्थापनादेखि सञ्चालत र व्यवस्थापनसम्म कामका लागि तहगत सरकारका आवश्यक प्रक्रियाहरु गर्न अनेक कारणले कठिनाइ भइरहेको उनले बताए । महासंघ कोशी प्रदेशले उपाय र आध्यान्त फन्ड म्यानेजमेन्ट लिमिटेडको सहकार्यमा कानुनीदेखि व्यवसाय सुधार, बजार पहुँच र प्रतिस्पर्धात्मक क्षमता बढाउने जस्ता सेवा प्रदान गर्नका लागि पहिलो पटक व्यवसाय विकास सेवा (बिडिएस) प्रदान गर्न लागिएको जानकारी दिए ।

अध्यान्त संस्थाका प्रतिनिधि निश्चलसिंह भण्डारीले दुई वर्षदेखि उद्योग वाणिज्य महासंघ कोशीसँग सहकार्य गरिरहेको बताए । व्यवसाय सञ्चालन, ऋण लिनेदेखि लिएर अन्य प्रक्रियाहरुमा उद्योग तथा व्यवसायलाई सहयोग पुर्याउन कार्यक्रम महत्वपूर्ण रहने उनले बताए । आगामी तीन वर्षमा एक हजारभन्दा बढी व्यवसायीलाई सघाउने योजना रहेको उनले बताए ।

उदय परियोजनाका विष्णु काफ्लेले उद्योगीले व्यहोर्नु परेका समस्या समाधान गर्नका लागि बिडिएस सुरु हुन लागेको बताउँदै यसबाट धेरैभन्दा धेरै उद्योगीहरुले लाभ लिन सक्ने बताए । सहज परियोजनाकी टिम लिडर रिमा श्रेष्ठले नेपालको विकास गर्न साना तथा मझौला उद्योगहरुको संरक्षण र विकासमा जोड दिनुपर्ने बताइन् ।

उपाय परियोजनाकी सिईओ शोभा श्रेष्ठले व्यावसायिक व्यक्ति, साना र मझौला उद्योगहरु एवं व्यापार संगठनहरुका आवश्यकताहरु सम्बोधन गर्न बिडिएस कार्यक्रम प्रभावकारी रहेको बताइन् । डायनो टेक ग्लोबल प्रा. लिका प्रदीप सिग्देलले व्यवसायमा प्रविधिको धेरै महत्वपूर्ण भूमिका हुने उल्लेख गर्दै व्यवसाय विस्तरा र विकासमा बिडिएसले सहयोग पुग्ने बताए ।