ककटेल २ बाट दिपिका बाहिर

सन् २०१२ मा दिनेश विजनले सुपरहिट बलिउड फिल्म ककटेल बनाए । यस फिल्ममा सैफ अली खान, दीपिका पादुकोण र डायना पेन्टी मुख्य भूमिकामा थिए । विजनले छिट्टै नै ककटेल २ बनाउन लागेको चर्चा छ । यसका स्टारकाष्ट पनि फाइनल भइसकेका छन् । रोचक कुरा के छ भने फिल्मको सिक्वेलमा दीपिका पादुकोण र सैफ अली खान छैनन् । यसमा शाहिद कपुरसँग दक्षिण भारतीय अभिनेत्रीको जोडी देखाइनेछ ।

यस पटक ककटेलको सिक्वेलमा बिल्कुलै नयाँ स्टार कास्ट देखिनेछ । खबरका अनुसार चर्चित दक्षिण भारतीय अभिनेत्री रश्मिका मन्डन्ना ककटेल २ मा शाहिद कपुर र कृति सेननसँग काम गर्ने छिन् । यसका लागि शाहिद कपुर र कृति सेननको नाम फाइनल भइसकेको बताइएको छ । अहिले तेस्रो लिड एक्सट्रेसमा रश्मिका मन्डन्नाको नाम चर्चामा छ ।

कृति सेनन र शाहिद कपूरले यसअघि ‘तेरी बातों में ऐसा उल्झा जिया’मा सँगै काम गरेका थिए । उनीहरुको केमेस्ट्रीलाई फ्यानहरुले निकै रुचाएका थिए । मिडिया रिपोर्टका अनुसार फिल्म ककटेल २ को कथा लभ रञ्जनले लेखेका हुन् । यसलाई होमी अदजानियाले निर्देशन गर्नेछन् ।

ककटेल २ को स्क्रिप्ट तयार भइसकेको बताइएको छ । फिल्ममा ह्युमरको साथमा मित्रताको कहानी देखाइनेछ । फिल्ममा त्रिकोणात्मक प्रेम देख्न पाइनेछ । तर यस पटक दीपिका पादुकोण र सैफको केमेस्ट्रीलाई भने दर्शकले पक्कै मिस गर्नेछन् ।