एनपिएल हेर्नका लागि ब्रायन लारा नेपाल आउँदै

काठमाडौँ – वेस्टइन्डिजका लेजेन्ड क्रिकेट स्टार ब्रायन लारा नेपाल आउने भएका छन्।

नेपाल प्रिमियर लिग (एनपिएल) को अवलोकनका लागि लारा नेपाल आउन लागेको नेपाल क्रिकेट संघ क्यानका सचिव पारस खड्काले जानकारी दिएका छन्।

पारस खड्काले सामाजिक सञ्जाल फेसबुकमार्फ लारा नेपाल आउने जानकारी गराए पनि उनी कहिले नेपाल आउने भनेर खुलाएका छैनन्।

उनले सामाजिक सञ्जाल फेसबुकमा लेखेका छन्,’फेस्टिबल अफ हिमालयजमा रमाइरहेका क्रिकेट समुदायलाई एउटा सुखद सरप्राइज छ।’

उनी अगाडि लेख्छन्, ‘क्रिकेट इतिहासका एक अविश्वसनीय तथा महान खेलाडी, ‘प्रिन्स अफ ट्रिनिडाड’ भनेर चिनिने ब्रायन चार्ल्स लारा अब नेपाल आउँदै छन्। उहाँको आगमनले सम्पूर्ण क्रिकेट प्रेमीहरूलाई उत्साहित बनाउने छ। महानताको प्रत्यक्ष साक्षी बन्न तयार हुनुहोस्।’

उनले अगाडि लेखे, ‘यो नेपालका क्रिकेट फ्यानहरूका लागि एउटा दुर्लभ अवसर हो,जसमा खेल इतिहासका एक जीवन्त किंवदन्तीलाई नजिकबाट देख्न र सुन्न पाउने छन्।’