गोली हानेर ६९० किलो गाँजा बरामद

विराटनगर । लागुऔषध गाँजाको ओसारपसार र कारोबारमा संलग्न गिरोहले यसको तस्करीका लागि नयाँ–नयाँ शैली अपनाउन थालेका छन् । गिरोहले स्कोरपिओ गाडीमा सरकारी नम्बर प्लेट राखेर गाँजा तस्करी गर्ने गरेको पाइएको छ । प्रहरीले गोली प्रहार गरेर सरकारी नम्बर प्लेट लगाइएका दुईवटा गाडीलाई सुनसरीको धरान उपमहानगरपालिका–१३ अमरहाटबाट मंगलबार साँझ नियन्त्रणमा लिएको छ ।

धनकुटाबाट धरानतर्फ आउँदै गरेका स्कोरपिओलाई नियन्त्रणमा लिने क्रममा प्रहरीले इन्सास राइफलबाट ४ राउण्ड गोली प्रहार गरेको थियो । गोली हानेर गाँजा लोड गरिएका बा १ झ ४६०५ र बा १ झ ५१२७ नम्बरका दुईवटा गाडी नियन्त्रणमा लिइएको कोशी प्रदेश प्रहरी कार्यालय विराटनगरका प्रवक्ता एसएसपी भीमबहादुर दाहालले जानकारी दिए ।

सरकारी गाडीमा राखेर गाँजा ओसारपसार भइरहेको विशेष सूचना प्राप्त हुनसाथ नियन्त्रणमा लिन साँझ ७ बजेतिर इलाका प्रहरी कार्यालय धरानका डीएसपी प्रकाश जबेगूसमेतको टोली खटिएको थियो । सवारीसाधनहरु चेकजाँच गर्ने क्रममा सरकारी नम्बर प्लेट राखिएको ५१२७ नम्बरको गाडीलाई चालकले भगाएका थिए ।

प्रहरीले गोली प्रहार गरेपछि भागेको उक्त गाडी धरान–१३ को सूर्य मार्गमा छाडेर चालक फरार भएको एसएसपी दाहालले बताए । गाडीलाई भने प्रहरीले नियन्त्रणमा लिएको छ । चालक फरार रहेकाले खोजी भइरहेको प्रहरीले जनाएको छ ।