खोटाङ । दिक्तेलस्थित सरस्वती आधारभूत विद्यालयका प्रधानाध्यापक ३९ वर्षीय मेघराज धमलाको हृदयघातका कारण निधन भएको छ । दिक्तेल रूपाकोट मझुवागढी नगरपालिका–१ दिक्तेलका धमलाको बुधबार साँझ मृत्यु भएको हो ।
भाइटीका लगाएर काठमाडौंबाट दाजु यादव धमलासँग दिक्तेल आउँदै गरेका उनको नेपालथोक आएपछि मुटु दुखेपछि एम्बुलेन्समार्फत धुलिखेल लगिएको थियो । त्यहाँबाट गंगालाल हृदय रोग केन्द्रमा रेफर गरिएको र गंगालाल पुग्नासाथ त्यहाँका चिकित्सकले मृत घोषणा गरेको आफन्तले जनाएका छन् ।
उनको स्थानीय गुप्तेश्वर आर्यघाटमा अन्त्येष्टि गरिएको छ । धमलाको श्रीमती र दुई छोरी छन् ।उनको निधनको शोकमा शुक्रबार नगरपालिकामा आधा घण्टा झन्डा झुकाउने निर्णय गरिएको नगरपालिकाका प्रवक्ता दिनेश घिमिरेले बताए ।
