काठमाडौं । २०२४ सेप्टेम्बर १० देखि २३ सम्म हंगेरीको बुडापेस्टमा चेस (बुद्धिचाल)को महाकुम्भ ओलम्पियाड आयोजना हुँदै छ । जसमा नेपालबाट पाँच महिला र पाँच पुरुष गरी जम्मा १० खेलाडीले सहभागिता जनाउने छन् ।

ग्राण्ड मास्टर नभएका कारण नेपालले अहिलेसम्म कुनै पनि अन्तर्राष्ट्रिय प्रतियोगिताको तयारीका लागि ग्राण्ड मास्टरबाट खेलाडीलाई प्रशिक्षण दिन सकेको थिएन तर यसपालि नेपाल बुद्धिचाल संघले पहिलो पटक एसियन चेस महासंघको सहयोगमा काजकिस्तानका ग्राण्डमास्टर प्रशिक्षक बोलाएर प्रशिक्षण दिइरहेको छ । यसले खेलाडी पनि निकै उत्साहित छन् ।

लामो समयदेखि परम्परागत रूपमा खेलिँदै आएको बुद्धिचाल खेल पछिल्लो समय ग्रासरुटस्तर देखि नै विकास गर्न थालिएको छ । मस्तिष्कको विकासमा समेत ठूलो मद्दत पुग्ने भएकाले अहिले यसलाई विद्यालय स्तरदेखि नै खेलाउने गरिएको छ ।

नेपालका पुरुष खेलाडीले सन् २००४ देखि ओलम्पियाडमा सहभागिता जनाउन थालेका हुन् । त्यसको १० वर्षपछि मात्र २०१४ मा महिला खेलाडी नर्वे ओलम्पियाडमा पहिलो पटक सहभागी भए । तर त्यतिबेला कुनै पनि खेलाडीले ग्राण्डमास्टबाट प्रशिक्षण लिन पाएका थिएनन् । अहिले त्यो अभाव पूर्ति गर्न एसियन बुद्धिचाल महासंघको सहयोगमा काजकिस्तान बुद्धिचाल संघसँग सम्झौता गरेर ग्राण्डमास्टर ल्याइएको हो ।

14
Shares
३० श्रावण २०८१, बुधबार ०९:५३