गोठगाउँमा मेडिकल कलेज सञ्चालनका लागि सम्झौता

मोरङ । गोठगाउँस्थित पूर्वाञ्चल विश्वविद्यालयमा मेडिकल कलेज सञ्चालनका लागि विराटनगरको कोशी अस्पताललाई प्रयोग गर्ने गरी सम्झौता भएको छ।

सोमबार शिक्षा, विज्ञान तथा प्रविधि मन्त्रालय, स्वास्थ्य तथा जनसंख्या मन्त्रालय र पूर्वाञ्चल विश्वविद्यालयबीच कलेजको प्रयोगात्मक अभ्यासका लागि कोशी अस्पताल प्रयोग गर्ने गरी त्रिपक्षीय सम्झौता भएको हो।

मन्त्रिपरिषदले पूर्वाञ्चल विश्वविद्यालयलाई मेडिकल कलेज सञ्चालन गर्न स्वीकृति दिएपछि कोशी अस्पताललाई प्रयोग गरेर कलेज सञ्चालन गर्ने गरी त्रिपक्षीय सम्झौता गरिएको प्रतिनिधि सभा सदस्य एवं काठमाडौं मेडिकल कलेजका सञ्चालक डा.सुनिल शर्माले जानकारी दिए।

डा. शर्माले भने, ‘कोशी अस्पताललाई पूर्वाञ्चल विश्वविद्यालयको प्रयोगात्मक अभ्यासका लागि प्रयोग सकिने गरि सम्झौता भएको छ। यद्धपी, अब बाँकी प्रक्रिया चिकित्सा शिक्षा आयोगबाट पुरा गर्दै मेडिकल कलेज सञ्चालन गर्छौ।’

त्रिपक्षीय सम्झौता पत्रमा शिक्षा, विज्ञान तथा प्रविधि मन्त्रालयका सचिव रामकृष्ण सुवेदी, स्वास्थ्य तथा जनसंख्या मन्त्रालयका सचिव डा.रोशन पोखरेल र पूर्वाञ्चल विश्वविद्यालयका उपकुलपति यादवराज कोइरालाले हस्ताक्षर गरेका छन्।

अर्कोतर्फ कोशी अस्पतालले गतवर्ष माघ २४ गते पूर्वाञ्चल विश्वविद्यालयलाई अभ्यासका लागि अस्पताल प्रयोग गर्न दिने सहमति गरेको थियो। सहमतिको एक वर्षपछि ०७९ माघ २३ गते मन्त्रिपरिषद बैठकले विश्वविद्यालय र कोसी अस्पतालबीचको सम्झौता अनुमोदन गर्दै मेडिकल कलेज सञ्चालनको बाटो खोलेको हो।

मेडिकल कलेज सञ्चालनका लागि ३ सय बेडको अस्पताल चाहिने प्रावधान छ। तर, पूर्वाञ्चल विश्वविद्यालयसँग हाल सो क्षमताको अस्पताल छैन। जसका कारण ३ सय ५० शैयाको कारण कोशी अस्पतालमा अभ्यासका लागि सम्झौता भएको हो। मेडिकलका अन्य पठनपाठन भने गोठगाँउमै हुनेछ।