सन्दीप लामिछानेको मुद्दा हेर्दाहेर्दैमा

काठमाडौं ।क्रिकेटर सन्दीप लामिछानेलाई थुनामा राखेर प्रक्रिया अघि बढाउने अथवा धरौटीमा रिहा गर्नेबारे सर्वोच्च अदालतमा आइतबार सुनुवाइ हुने भनिए पनि हेर्दाहेर्दैमा राखिएको छ ।

सन्दीपले लिग टुअन्तगर्तको सिरिज खेल्न यूएई जान पाउँ भनी दिएको निवेदनमा अदालतले अन्तरिम आदेश दिएको थिएन । पाटन उच्च अदालतले पुस २८ गते धरौटीमा रिहा गर्न दिएको आदेशविरुद्धको रिटसहित आइतबार दुवै रिटको एकै ठाउँमा सुनुवाइ हुने तयारी थियो । न्यायाधीश सपना मल्ल प्रधान र कुमार चूडालको इजलासले लामिछानेको सुनुवाइलाई सोमबार निरन्तरता दिनेछन् ।

उच्च अदालतको आदेश त्रुटिपूर्ण भएकाले पुर्पक्ष थुनामै राखेर मुद्दा अघि बढाउनुपर्ने मागसहित महान्याधिवक्ताको कार्यालयले सर्वोच्चमा निवेदन दिएको थियो ।

न्यायाधीश ईश्वर खतिवडाको इजलासले दुवै निवेदन एकसाथ राखेर आइतबार पेस गर्न आदेश दिएका थिए । सन्दीपमाथि नाबालिग जबरजस्ती करणीको आरोप लागेको छ ।

उच्च अदालतले २० लाख धरौटीमा रिहा गरेपछि नेपाल क्रिकेट संघ (क्यान) ले उनीमाथि लगाएको निलम्बन फुकुवा गर्दै राष्ट्रिय टिममा समावेश गरेको थियो ।