संगठन सुधार्न मोरङ कांग्रेसको पहल

विराटनगर। नेपाली काँग्रेस मोरङले पार्टीलाई सुदृढ र बलियो बनाउन पहल थालेको छ । यस क्रममा बुद्धिजीविहरुसँग छलफल गरिएको छ ।

विराटनगरमा भएको छलफलमा मोरङ कांग्रेस सभापति तथा प्रतिनिधि सभा सदस्य डिगबहादुर लिम्बूले अल्पमतमा रहेर जनताको मन जित्नेगरि काम गर्नुपर्नेमा जोड दिए। सभापति लिम्बूले आर्थिक क्षेत्रलाई सबल बनाउन बुद्धिजीविहरुसँग सुझाव मागेका थिए ।

सहभागीले मुलुकको शिक्षा क्षेत्रलाई सही ब्यस्थापन, कृषि क्षेत्रमा आधुनिकिकरण, औद्यागिक क्षेत्रको चलायमान, स्वास्थ्य क्षेत्रमा सुधार लगायतका विषयमा भनाई राखेका थिए ।

महेन्द्र मोरङ क्याम्पसका प्राध्यापक बाबुराम तिम्सिनाले पछिल्लोसमय शिक्षा सेवा आयोगमा सुधार भएको बताए। उनले विश्वविद्यालय, क्याम्पस, विद्यालयको शैक्षिकस्तरमा सुधार हुनुपर्नेमा जोड दिए ।

महिला बालिकामा समेत चेतनाको कमी रहेको बताएका प्राध्यापक तिम्सिनाले प्रविधितर्फ अघि बढिरहँदा यसको सही ब्यवस्थापन गर्न सक्नुपर्ने बताए ।

डिएलए मोरङका पूर्व सचिव दुर्गाप्रसाद पोखरेलले पार्टीभित्र देखिएको विभिन्न धारणाले नकारात्मक सन्देश छरिरहेको बताए । उनले पार्टीलाई सुदृढ र बलियो बनाउनका लागि एकतासहित एकै धारणा आउनुपर्ने बताए ।

उनले कृषकलाई समस्या हुने र मर्का पर्ने विषयले स्थान नपाउनु दुखद भएको बताए । कृषकले उत्पादित बस्तुको मुल्य नपाएर सडकमा फाल्नुपर्ने अवस्था आइरहदाँ सदनमा कसैले आवाज नउठाउनु आफैमा बिडम्वना भएको पोखरेलले बताए ।

विराटनगर महानगरपालिकाका मेयर नागेश कोइरालाले आर्थिक क्षेत्र केही सीमित घरानाका कारण संकटमा परेको बताए । उनका अनुसार ६३ जना व्यापारीले मुलुकको ८० प्रतिशतभन्दा बढी रकम चलाएको विषयले सदनमा आउनुपर्नेमा जोड दिए ।

कृषि क्षेत्रलाई सबल बनाउनका लागि सदनमा कुरा राख्न सुझाव दिँदै मेयर कोइरालाले रासायनिक मलसँगै अर्गानिक मलखादलाई जोड दिन आग्रह गरे ।

मुलुकमा मल उत्पादन क्षेत्रको कमी रहेको बताएका मेयर कोइरालाले भोलिका दिनमा अर्गानिक मलको विकल्प नभएको उल्लेख गरे । यूरिया मल समयमा उपलब्ध हुननसक्दा बर्षेनी कृषक मर्कामा पर्ने गरेको उनको भनाई छ ।

छलफलमा बुद्धिजिवीहरुबाट प्राप्त सल्लाह सुझावलाई लिपिबद्ध गर्दै सदनमा उठान गर्ने सभापति लिम्बूले प्रतिबद्धता ब्यक्त गरेका थिए ।

छलफलमा कांग्रेससँग आवद्ध प्रजातान्त्रिक प्राध्यापक संघ, प्रजातान्त्रिक ईन्जिनियर एसोसिएसन, डिएलए, ने टेड्र युनियन, नेपाल शिक्षक संघ, बित्तीय कर्मचारी संघलगायत संस्थाका पदाधिकारीको सहभागिता रहेको मोरङ कांग्रेस सचिव मोदराज घिमिरेले जानकारी दिए ।