जसपाका यादव बने मधेश प्रदेशको मुख्यमन्त्री

विराटनगर । मधेस प्रदेशको मुख्यमन्त्रीमा जनता समाजवादी पार्टी नेपाल (जसपा) का सरोजकुमार यादव नियुक्त भएका छन् ।

प्रदेश प्रमुख हरिशंकर मिश्रले आज बुधबार यादवलाई मुख्यमन्त्रीमा नियुक्त गरेका हुन् । संविधानको धारा १६८ को उपधारा २ बमोजिम यादव मुख्यमन्त्रीमा नियुक्त भएका हुन् ।

प्रदेश प्रमुख मिश्रसमक्ष ६३ जना प्रदेशसभा सदस्यहरूको हस्ताक्षरसहित यादवले मुख्यमन्त्रीका लागि दाबी पेश गरेका थिए ।

उनलाई नेकपा एमाले, माओवादी केन्द्र, जनमत, राप्रपा, नेपाल संघीय समाजवादी पार्टीका प्रदेशसभा सदस्यले समर्थन गरेका छन् ।

यस्तै स्वतन्त्र प्रदेशसभा सदस्यहरू सुरिता साह र अनिरूद्द सिंहले समेत उनलाई समर्थन गरेका छन् ।

मधेश प्रदेश सभामा १०७ जना सांसदहरू रहेकोमा सरकार गठनका लागि ५४ जना सांसदको समर्थन चाहिन्छ।

प्रदेश सभामा नेकपा एमालेका २३, जनमत पार्टीका १३, जसपाका १३, नेकपा माओवादी केन्द्रका ९, राष्ट्रिय प्रजातन्त्र पार्टी र नेपाल संघीय समाजवादी पार्टीका १–१ सदस्य तथा स्वतन्त्र २ प्रदेशसभा सदस्यहरूसहित कूल ६३ जनाले यादवलाई समर्थन दिएका छन् ।