अस्पतालमा तोडफोडपछि सेवा प्रभावित

विराटनगर । झापाको दमकस्थित आम्दा अस्पताल तोडफोड भएको छ । तोडफोडपछि अस्पतालले उपलब्ध गराउँदै आएका सेवाहरू अवरुद्ध छ ।

मङ्गलबार बिहान अस्पतालका विभिन्न विभाग तोडफोड भएको थियो ।

दुई दिनका एक शिशुको मृत्यु भएपछि आक्रोशित बनेका शिशुका परिवार तथा आफन्तले अस्पताल तोडफोड गरेका हुन् ।

गर्भवती महिलालाई राखेर सुत्केरी गराउने कार्यकक्ष केही दिन सञ्चालन नै गर्न नसकिने गरी तोडफोड भएको अस्पतालले जनाएको छ । सीसी क्यामरा पनि फुटाइएको छ ।

अस्पतालका मेडिकल डाइरेक्टर डा. प्रकाश शर्माका अनुसार अस्पतालमा निकै ठूलो क्षति पुगेको छ ।

अस्पतालमा भौतिक रूपमा लाखौँको क्षति भएको र स्वास्थ्यकर्मीलाई काम गर्न नै डराउने अवस्था आएको भन्दै शर्माले घटनाको निष्पक्ष छानबिन हुनुपर्ने बताभएका छन् ।

अस्पताल तोडफोडपछि जनपथ र सशस्त्र प्रहरीको टोली पुगेर अस्पताल तथा स्वास्थ्यकर्मीलाई सुरक्षा दिएको छ ।

घटनाको विषयमा अनुसन्धान सुरु गरिएको र प्रहरीलाई घटनाको विषयमा ढिला गरी जानकारी भएको इलाका प्रहरी कार्यालय दमकका प्रमुख दिलीप गिरीले बताए ।