प्रदेशसभा बैठक आज बस्दै

विराटनगर । प्रदेश १ प्रदेश सभाको दोस्रो बैठक आज मंगलवार बस्दैछ । बैठक बिहान ११ बजे बस्ने छ । बैठकले सभामुखको निर्वाचनको मिति तोक्ने छ ।

आइतबारको कार्य व्यवस्था समितिको बैठकले पुस २८ गते सभामुखको निर्वाचन गर्ने सहमति गरेको थियो । उपसभामुखको निर्वाचन पुस ३० गते हुनेछ ।

सभामुखको निर्वाचन कार्य तालिका सार्वजनिक गर्ने र मनोनयन पनि आज नै गर्ने तयारी रहेको प्रदेशसभा सचिवालयले जनाएको छ ।

सत्तारुढ गठबन्धनबीच भागबन्डा गर्दा प्रदेश १ को मुख्यमन्त्री नेकपा एमाले र सभामुख नेकपा माओवादी केन्द्रको भागमा परेको छ ।

मुख्यमन्त्री आलोपालो हुनुपर्ने माग राख्दै माओवादी केन्द्र भने सरकारमा सामेल भएको छैन । माओवादीले मुख्यमन्त्रीमा हिक्मत कार्कीलाई दिएको समर्थन भने कायमै राखेको छ ।

अघिल्लो प्रदेशसभाले राजधानी विराटनगरलाई तोकेको थियो । तर अर्को मुख्य काम प्रदेश नामकरण भने अझैसम्म हुन सकेको छैन ।

यो प्रदेशसभाले प्रदेशको नाम राख्ने अपेक्षा गरिएको छ । मुख्यमन्त्री कार्कीले सकेसम्म सहमति गरी प्रदेशको नामकरण टुंग्याउने प्रतिबद्धता जनाउँदै आएका छन् ।