विराटनगरमा आकाशे पुल: शिलान्यास भयो, काम अघि बढेन

सतिसकुमार राजवंशी

विराटनगर । विराटनगर महानगरपालिको बनाउने भनेको आकाशे पुल योजना अलमलमा परेको छ । योजना पारित गरेको दुई वर्ष बितिसक्दा समेत निर्माण कार्य हुन सकेको छैन ।

२०७७ चैत २ गते तत्कालीन मेयर, हाल प्रदेशसभा सदस्य भीम पराजुलीले आकाशे पुलको शिलान्यास गरेका थिए । तीन स्थानमा पुल बनाउने भनेर शिलान्यास भएको थियो ।

निर्माणको ठेक्का पाएको जोशी आरके जेभीले महानगरबाट प्रारम्भिक रुपमा ५ लाख रुपैयाँ बुझेर कामको थालनी समेत गरेका थिए ।

स्थानीय रमेशकुमार तबदार समेतका केही जग्गा धनीले महानगरले निर्माण गर्ने भनेको कञ्चनबारीस्थित आकाशे पुलको जग्गा आफ्नो स्वामित्वमा रहेको भन्दै निर्माण नगर्न मागसहित मुद्दा दायर गरे ।

निषेधाज्ञायुक्त परामादेश जारी गर्न माग गर्दै उनीहरुले उच्च अदालत विराटनगरमा मुद्दा दायर गरेका हुन् । उक्त रिट निवेदन ‘कार्वाहीयुक्त अवस्था’ मा रहेको उच्च अदालत विराटनगरले जनाएको छ ।

निवेदनको विषयवाट स्थलगत दृष्य नआउने भएकाले ०७९ जेठ ५ मा मुख्य न्यायधीशको इजलासले प्राविधिक टोलीसहित स्थलगत जाँच गर्न अदेश दिएको छ ।

आकाशे पुलको योजना प्रचारमुखी मात्र भएको स्थानीयको भनाइ छ । ‘पूर्व अनुगमन नगरी या पब्लिसिटीस्टन्ट गर्न गरिएको योजना कहिले सफल हुन्छ र ?’ कञ्चनबारीकी एक स्थानीयले भनिन् ।

महानगरले आफ्नो पसल अगाडि पुल निमार्णका लागि भनेर बनाएको खाल्डाले गर्दा व्यवसायमा असर परेको उनको भनाइ छ । काम नगर्ने भए ढल व्यवस्थापन गरी पैदल यात्रुलाई सहज बनाइदिनुपर्ने उनले बताइन् ।

यस्तै कञ्चनवारीका अर्का स्थानीयले आफुहरु वारम्वार पूर्वमेयर र वहालवाला मेयरकहाँ गएर समस्या राख्दा आश्वासनमात्रै दिइने गरेको बताए ।

काम कुरो एकातिर कुम्लो बोकी ठिमीतिर भनेझै आकाशे पुल निर्माण गर्ने भनेर खनेको खाल्डो अहिले जोखिमपूर्ण बनेको र डम्पिङ साइटको रुपमा प्रयोग भइरहेको उनले बताए ।
जोगबनीदेखि धरानसम्मै सवारी साधनको बढी चाप हुने गर्छ । त्यही सडकको बरगाछीमा पनि आकाशे पुल निमार्ण हुने भनिएको हो । ‘आकासको फल आँखा तरी मर भनेझैँ भयो’ स्थानीय बबिता साहले भनिन् । निर्माण गरे दैनिक हुने दुर्घटना कम हुने तर यसतर्फ ध्यान नगएको उनको भनाइ छ ।

स्थानीय राजेश मण्डल बरगाछीमा आकाशे पुल निर्माण हुन लागेको सुन्दा खुसी भएका थिए । तर घोषणा गरेर शिलान्यास पनि गरिसकेको योजना अघि नबढ्दा भने उनी निरास भएका छन् ।

निर्माण हुन नसक्नुमा उनले राजनीतिक किचलोलाई दोष दिएका छन् ।सरकार परिवर्तन भएसँगै योजना परिवर्तन हुने हुदा पुराना योजनाहरुको बिचल्ली हुने गरेको उनको बुझाई छ ।

विराटनगर महानगर योजना महाशाखा प्रमुख भरतकुमार न्यौपानेका अनुसार महानगरले राजमार्गमा पैदल यात्रीलाई सहज हुने उद्देश्यका साथ महानगरका कञ्चवारी, बरगाछी र बस पार्कनजिक आकाशे पुल निर्माणको योजना अगाडि सारेको हो ।

त्यसका लागि डिजाइन, अध्ययन गर्न प्रविधिक टोली खटाएर, परामर्शदाताहरु राखेर टेन्डर आह्वान गर्नु अगावै स्थानीय, वडा अध्यक्ष, उपप्रमुख र प्रमुखबाट स्वीकृत भएको योजना बताए ।

महानगरले बनाउन लागेको आकाशे पूल विशुद्ध सार्वजनिक सडकको जग्गा रहेकोले आफूहरुले काम गर्न ५ लाख विनियोजन समेत गरेको उनले बताए ।

महानगर प्रमुख नागेश कोइरालाले आकाशे पूलको आशा जिवितै रहेको बताए । मुख्य ३ कारण खुलाउँदै मेयर कोइरालाले अदालतको आदेश आएपछि विराटनगरको वडा ४ मा एउटा र अन्य दुईको लागतलाई सिंघिया खोलामा पैदल यात्रुका लागि पुल निर्माण गर्ने बताए ।

घाँस चोकमा प्रदेश सरकारले अत्याधुनिक आकाशे पुल निर्माण गर्ने भएकाले २ वटा आकाशे पुल राजमार्गमा पर्याप्त हुने उनले बताए ।

उच्च अदालत विराटनगरका अनुसार प्राविधिक टोली माघ २६ गते स्थलगत अध्ययनका लागि जाने टुंगो भएको छ । अध्ययनको प्रतिवेदन बुझेर रिट खारेज हुने वा थप प्रक्रिया अघि बढ्ने टुंगो लाग्ने जनाइएको छ ।