एक सातामा २८ लाखको सामान बरामद

विराटनगर । एक साताको अवधिमा मोरङ प्रहरीले तस्करी भएर आएको झन्डै २८ लाख मूल्य बराबरको सामान बरामद गरेको छ ।

मोरङ प्रहरीका प्रवक्ता डिएसपी टिकाबहादुर कार्कीका अनुसार एक हप्तामा मोरङ प्रहरी र मातहत कार्यालयहरू समेत गरी जिल्लाका विभिन्न स्थानमा चोरी तस्करी भएर आएको २७ लाख ९२ हजार ६८३ मूल्य बरावरको सामान बरामद गरिएको हो ।

भारतबाट नेपालतर्फ भन्सार छली चोरी पैठारी गरी ल्याएको खाद्यान्न, लत्ताकपडा, मोटर पार्टस, ग्याँस चुलोको बर्नरहरू लगायतका सामान बरामद गरेको उनले बताए ।

बरामद गरेको सामान आवश्यक कारबाहीको लागि विराटनगर भन्सार कार्यालयमा बुझाइएको छ ।

मोरङ प्रहरी र विराटनगर भन्सारले केही दिनअघि ५६ लाख मूल्य बरावरको तस्करीको सामान नियन्त्रणमा लिएका थिए ।

विराटनगरको महावीर रोडमा अनिल साहको गोदाममा छापा हानेर अवैध रूपमा भन्सार छली गरेको दुई गाडी कपडा बरामद गरेको थियो ।