राहदानी र लाइसेन्स वितरण सहज बनाउन प्रधानमन्त्रीको निर्देशन

काठमाडौं । प्रशासनिक सुधारका लागि समस्या पहिचानको प्रयास थालेका प्रधानमन्त्री पुष्पकमल दाहालले आज पनि विभिन्न मन्त्रालयका सचिवहरुसँग छलफल गर्दैछन् ।

हिजो (सोमबार) पनि सचिवहरुसँग सामूहिक छलफल गरेका प्रधानमन्त्री दाहालले आज पनि छलफल गर्ने र सचिवहरुलाई आवश्यक निर्देशन दिने प्रधानमन्त्रीका स्वकीय सचिव रमेश मल्लले जानकारी दिए ।

आज बिहान ११ बजेपछि सचिवहरुसँग छलफल सुरु हुने छ । सचिवहरुले कार्यविवरण प्रस्तुत गरिसकेपछि प्रधानमन्त्री दाहालले निर्देशनात्मक सम्बोधन गर्ने कार्यक्रम रहेको मल्लेले बताए। भाषणभन्दा कामलाई प्राथमिकता दिने प्रतिबद्धता जनाउँदै आएका प्रधानमन्त्री दाहालले प्रशासनिक समस्या पहिचानको प्रयास थालेका हुन् ।

पुस १० गते प्रधानमन्त्रीमा नियुक्त भएपछि दाहालले पहिलोपटक सबै मन्त्रालयका सचिवहरुसँग छलफल गरेका हुन् । प्रधानमन्त्री कार्यालय सिंहदरबारमा हिजो साढे २ घण्टासम्म भएको छलफलमा सचिवहरुले आ–आफ्नो मन्त्रालयका आयोजना, भइरहेका काम र समस्याबारे प्रधानमन्त्रीलाई जानकारी गराएका थिए ।

सचिवहरुका भनाइ सुनेपछि प्रधानमन्त्री दाहालले सकेसम्म समस्या समाधान गर्ने प्रतिबद्धता जनाएका थिए । प्रधानमन्त्रीमा नियुक्त भएपछि दाहालले सुशासन, नागरिकलाई सरल र सहज रूपमा सेवा प्रदान गर्ने घोषणा गरेका थिए ।

राहदानी वितरण, सवारी चालक अनुमतिपत्रलगायत सेवाग्राहीको बढी भीडभाड हुने कार्यालयको कामलाई सरल र सहज बनाउनु पर्ने प्रधानमन्त्री दाहालको जोड छ ।