काम गर्न भारतको हरियाणा गएका मोरङका चारजना युवा सम्पर्कविहीन

विराटनगर । रोजगारीका लागि भारतको हरियाणा पुगेका मोरङ सुनबर्षी नगरपालिकाका चारजना युवा सम्पर्कविहीन बनेका छन् ।

रोजगारीका लागि उक्त नगरपालिकाका नौजना हरियाणा गएका थिए । तीमध्ये पाँचजना भागेर फर्किएका छन् । चारजनाको अवस्था भने अज्ञात छ । उनीहरुका परिवार चिन्तामा छन् ।

तीन महिनाअघि उनहिरु हरियाणा गएका थिए । सुनबर्षीका १७ वर्षका साइला टुडु, २३ का राजकुमार टुडु, २४ वर्षका विनोदकुमार राजवंशी, २२ वर्षका महेश हेमरन बेपत्ता भएका छन् ।

३१ वर्षका बुद्धिमान टुडु उसको भाइ २३ वर्षका बुद्राई टुडु मिलबाट भागेर गाउँ आइपुगेका थिए । उनीहरु आएपछि आफ्नो भाइको खोजीमा गएका महेशका दाइ सक्कलले २० वर्षका संजयकुमार टुडु, १६ वर्षका विक्रम सोरेन र २८ वर्षका मोहन वास्कीसहित नजिकै अर्को गाउँका ५ जना युवालाई फर्काएर ल्याएका थिए ।

आफ्नो भाइसहित चारजना भने सम्पर्कविहीन रहेको उनले बताए ।

उनीहरुलाई सेलर मिलमा धान सुकाउने र उठाउने कामका लागि भनेर लगिएको थियो । ठेकेदारहरुले भारतीय रुपैयाँ प्रति बोरा १० रुपैयाँ पाइन्छ भनेर लगेको बताउँदै, बुद्धिमानले तर काम थालेपछि भने प्रतिबोरा ६ रुपैयाँ मात्र दिने भनिएको बताए ।

बेपत्ताका परिवारले उनीहलाई लैजाने सुरेन शर्मा र लुखिराम वाक्सीविरुद्ध इलाका प्रहरी कार्यालय रंगेलीमा उजुरी दिएका छन् ।

गाउँका युवाहरुलाई पैसाको लोभ देखाएर भारत पुर्याएर बेपत्ता बनाएको पीडित परिवारले आरोप लगाएका छन् ।

भागेर आएका बुद्राई टुडुका अनुसार राति १२/१ बजेसम्म काम गर्नु पर्थो । बिहान चिया, बिहान ११ बजे खाना र राती ११ बजे मात्रै खाना पाइने उनको भनाइ छ ।

धान सुकाउने, उठाउने गरी प्रति बोरा भारतीय रुपैयाँ १० दिने भनेर लगे पनि केही दिनपछि ६ रुपैयाँ मात्रै दिइने मिलका कर्मचारीले बताएका थिए ।

इलाका प्रहरी कार्यालय रंगेलीका प्रमुख प्रहरी निरीक्षक शैलेश न्यौपानेले बेपत्ता सम्बन्धमा मोरङको अमरदह र झापा चन्द्रगढीका व्यक्तिविरुद्ध उजुरी परेको छ । घटनाबारे छानबिन गर्ने तयारी भइरहेको उनले बताए ।