डेढ महिनामा भारतबाट ४ अर्बको धान आयात

काठमाडौं । भारत सरकारले लगाएको प्रतिबन्ध खुलेपछि वीरगन्ज भन्सार नाकाबाट डेढ महिनामा करिब ४ अर्ब रुपैयाँको धान आयात भएको छ ।

भारत सरकारले गत कात्तिक १५ गतेदेखि नेपालको लागि धानको निर्यात खुला गरेको थियो ।

धानको आयातमा आएको सहजतासँगै कात्तिक १५ गतेदेखि मंसिर मसान्तसम्म ३ अर्ब ९८ करोड ६६ लाख ४३ हजार रुपिया बराबरको ९९ हजार ९ सय ४८ मेट्रिक टन धान आयात भएको वीरगन्ज भन्सार कार्यालयले जनाएको छ ।

६ लाख मेट्रिक टन धानमा कर नलाग्ने गरी कोटा नै तोकेर भारतले नेपालका लागि निर्यात खुला गरेपछि अहिले नेपाली व्यापारीहरुले भारतबाट धमाधम धान आयात गरिरहेका छन् ।

नेपालकै प्रमुख भन्सार नाका वीरगन्जस्थित एकिकृत भन्सार जाँच चौकी (आईसिपि) को यार्डमा आँखाले देख्नसक्ने जति ठाउँ अहिले धान बोकेको मालबाहक सवारीका साधनले ओगटेका छन् ।

दिनहुँ भारतबाट धान बोकेर नेपाल भित्रिएका मालवाहक सवारीका साधनहरु भन्सार परिसरमा राखिएको छ ।

नेपाल सरकारको पहल र व्यवसायीहरूको अनुरोधमा भारत सरकारले कात्तिक १५ गतेदेखि धानमा लगाएको प्रतिबन्ध हटाएको वीरगञ्ज उद्योग वाणिज्य संघका अध्यक्ष डा. सुबोधकुमार गुप्ताले बताएका छन् ।

‘भारत सरकारले आन्तरिक उत्पादन घटेको र मुलुकभित्रै खपत बढी भएकाले नेपालमा धान निर्यात रोकेको थियो, हाम्रो माग १६ लाख मेट्रिक टन धान शून्य भन्सार शुल्कमा नेपालका लागि छोडिदिनुपर्छ भन्ने हो तर अहिले भारत सरकारले ६ लाख मेट्रिकटन धानमा मात्रै भन्सार नलाग्ने निर्णय गरेको छ’ अध्यक्ष गुप्ताले भने ।

भारतको आफ्नै आन्तरिक खपतलाई नपुग्ने भएपछि नेपालका लागि धानको निर्यातमा प्रतिबन्ध लगाएको थियो । तर नेपाली व्यवसायीहरूको अनुरोध र नेपाल सरकारको पहलमा भारत सरकारले कार्तिक १५ गतेबाट प्रतिबन्ध हटाएपछि भारतबाट धानको आयात सहज भएको हो ।