पुस १७ गते प्रदेशसभाको अधिवेशन

विराटनगर । प्रदेश १ प्रदेशसभाको अधिवेशन पुस १७ गते बस्ने भएको छ । निर्वाचनबाट चुनिएका सांसदहरुको हिजो सोमबार शपथग्रहण सम्पन्न भएको थियो ।

प्रदेश प्रमुख परशुराम खापुङले प्रदेश सरकार, मन्त्रिपरिषद्को पुस ११ गतेको सिफारिसमा प्रदेश प्रमुखले नेपालको संविधानको धारा १८३ को उपधारा १ बमोजिम प्रदेश सभाको आह्वान गरेका हुन् ।

प्रदेश सभाको प्रथम अधिवेशन पुस १७ गते आइतबार दिनको १ बजे बस्नेछ ।

प्रदेश १ मन्त्रिपरिषद् बैठकले प्रदेश सभाको अधिवेशन आह्वान गर्न सिफारिस गरेको थियो ।

मुख्यमन्त्री राजेन्द्रकुमार राईको अध्यक्षतामा बसेको बैठकले नेपालको संविधानको धारा १८३ को उपधारा १ बमोजिम प्रदेशसभाको प्रथम अधिवेशन आइतबार १ बजेका लागि आह्वान गर्न प्रदेश प्रमुखसमक्ष सिफारिस गर्ने निर्णय गरेको थियो ।

प्रदेश प्रमुखले प्रदेश सभाका लागि भएको निर्वाचनको अन्तिम परिणाम घोषणा भएको मितिले २० दिनभित्र प्रदेश सभाको अधिवेशन आह्वान गर्ने संवैधानिक व्यवस्था रहेको छ ।