‘देउवाले राजीनामा नदिए विशेष अधिवेशन बोलाइनेछ’

विराटनगर । निर्वाचनबाट पार्टी पहिलो बनेको भए पनि गठबन्धनलाई कायम गर्न नसक्दा पार्टीले क्षति बेहोर्नुपर्दा नेपाली कांग्रेसभित्र असन्तुष्टि चुलिएको छ । सभापति शेरबहादुर देउवाको हठका कारण पार्टीको शक्ति क्षय भएको भन्दै नेताहरुले चर्को असन्तुष्टि पोख्न थालेका छन् ।

नेपाली कांग्रेसका नेता गुरुराज घिमिरेले पार्टी सभापति तथा संसदीय दलका नेता शेरबहादुर देउवाले नैतिकताको आधारमा दुवै पदबाट तत्कालै राजीनामा दिनुपर्ने बताएका छन् ।

सामाजिक सञ्जाल ट्विटरमा प्रतिक्रिया लेख्दै उनले देउवाले राजीनामा नदिए चाँडै विशेष महाधिवेशन बोलाइने चेतावनी पनि दिएका छन् ।

‘ने.का  सभापति तथा संसदीय दलका नेता शेरबहादुर देउवाले नैतिकताको आधारमा दुवै पदबाट तत्कालै राजीनामा दिनुपर्छ। हिजो पार्टीका साथीहरूले गठबन्धन गलत हो भन्दाभन्दै किन गरियो र आज किन जोगाउन सकिएन ? यसमा सत्तालिप्सा र भजनमण्डली कति जिम्मेवार छ । राजीनामा नदिए चाँडै विशेष महाधिवेशन बोलाइनेछ· उनले लेखेका छन् ।

नेतृत्वको अपरिपक्क निर्णय र अडानका कारण गठबन्धन टुटेको भन्दै कांग्रेसभित्र देउवाको आलोचना भइरहेको छ ।

गठबन्धनमा सहमति गर्न सकेको भए केन्द्रमा र प्रदेश सरकारहरुमा पनि पार्टीको पकड हुने थियो । तर नेतृत्वले अनावश्यक अडान राख्दा सबै गुमेको निष्कर्ष पार्टी नेताहरुको छ ।