वृत्ति परामर्श, उद्यम तथा रोजगार मेला सुरु

विराटनगर । सुनसरीको दुहबी नगरपालिकामा आजबाट वृत्ति परामर्श उद्यम तथा रोजगार मेला सुरु भएको छ । दुहबीका नगरपालिकाको आयोजना तथा प्रदेश १ सरकार लगायत निकायको सहकार्यमा मेला सञ्चालन गरिएको हो ।

मेलाको आज प्रदेश १ का मुख्य मन्त्री राजेन्द्रकुमार राईले उद्घाटन गरे । त्यस अवसरमा बोल्दै मुख्यमन्त्री राईले आर्थिक क्षेत्र चलायमान बनाउन साथै सीप भएका युवाहरुलाई रोजगारीको अवसर दिन यस्ता मेला महत्वपूर्ण हुने बताए ।

मेला आयोजनामा सहयोग गर्नेमा प्राविधिक शिक्षा तथा व्यावसायिक तालिम परिषद्, मनमोहन प्राविधिक विश्वविद्यालय, नेपाल उद्योग परिसंघ, नेपाल तालिम तथा रोजगार व्यवसायी महासङ्घ, व्यावसायिक सीप तथा तालिम प्रदायक सङ्घ लगायत छन् ।

शनिबारसम्म सञ्चालन हुने मेलाको उद्देश्य युवाहरुलाई रोजगारदातासँग सम्पर्क गराएर उनीहरुको सीप सदुपयोग गर्दै रोजगार बनाउनु रहेको दुहबी नगरपालिकाका मेयर बेदनारायण गच्छदारले बताए ।

स्थानीय सरस्वती माविको खेल मैदानमा आयोजित मेलामार्फत् समुन्नत दुहबी नगरपालिका निर्माणका लागि बेरोजगार युवालाई रोजगारी उपलब्ध गराइने जानकारी दिइएको छ ।

यसैगरी लघुउद्यमको माध्यमबाट परिष्कृत उद्यमशीलतामा प्रवर्धन गरी रोजगार र स्वरोजगारको अभिवृद्धि गराउने उद्देश्य पनि मेलाको रहेको जनाइएको छ ।

मेलाका अवसरमा स्थानीय आदिवासी जनजातिका मौलिक परिकार, स्थानीय लघु उद्यमीले उत्पादन गरेका सामग्रीहरुका स्टल पनि राखिएका छन् ।