औद्योगिक करिडोरमा अढाइ अर्ब लागतमा नयाँ रोलिङ मिल

विराटनगर । सुनसरी–मोरङ औद्योगिक करिडोरमा नयाँ रोलिङ मिल्स सञ्चालनमा आएको छ ।

सुनसरीको दुहबी नगरपालिका वडा १ मा २ अर्ब ५० करोडको लागतमा स्वस्तिक रोलिङ मिल्स सञ्चालनमा आएको हो ।

उद्योग व्यवस्थापनले आज पत्रकार सम्मेलन आयोजना गरी उत्पादनको विषयमा जानकारी गराएको हो ।

उद्योगका निर्देशक रमेश राठीका अनुसार उद्योगले बजरंग ब्रान्डको टिएमटी उत्पादन गर्छ । यसबाहेक बिलेटको व्यावसायिक कारोबार गर्नुका साथै छड, डिलेट, एंगल, च्यानल र आइबिमको उत्पादन गर्ने उनले बताए ।

नेपालका ९० प्रतिशत उद्योगले आफ्नै भट्टी राखेर आफैं ब्लेड उत्पादन गर्ने गरेको भन्दै उनले आफ्नो उद्योगको क्षमता दैनिक ५०० टन उत्पादन रहेको जानकारी दिए ।

उद्योगले भारतको टाटा स्टिल्सबाट कच्चापदार्थ आयात गरी अत्याधुनिक युरोपियन टेक्नोलोजीको प्रयोग गरी मजबुत, कम खिया लाग्ने र बढी लचकदार उत्पादन हुने गरेको जनाएको छ ।