प्रदेशसभा सदस्यहरूको शपथ पुस ११ मा

विराटनगर । नवनिर्वाचित प्रदेशसभा सदस्यलाई प्रदेश १ प्रदेशसभा सचिवालयले पुस ११ गते शपथ ग्रहण गराउने भएको छ । प्रदेश १ प्रदेशसभा सचिव गोपालप्रसाद पराजुलीका अनुुसार ११ गते दिउसो साढे १ बजे सपथ ग्रहणको समय तय गरिएको छ ।

९३ सदस्यीय प्रदेशसभाका ज्येष्ठ सदस्य गयानन्द मण्डलले सबैभन्दा पहिले प्रदेश प्रमुखबाट सपथ ग्रहण गर्नेछन् । त्यसपछि उनले प्रदेशसभा सदस्यहरुलाई सपथ ग्रहण गराउनेछन् ।

संविधानको धारा १८२ को उपधारा ५, प्रदेश सभा सदस्य निर्वाचन ऐन २०७४ को दफा ७५ र सुविधा सम्बन्धी ऐन २०७५ को दफा १९ बमोजिम सपथग्रहण गराउने सचिवालयले जनाएको छ ।

सपथ लिन आउने सांसदले निर्वाचन आयोगले दिएको प्रदेश सभा सदस्यको प्रमाणपत्र, नागरिकताको प्रमाणपत्रको प्रतिलिपि र दुई प्रति पासपोर्ट साइजको फोटो लिएर दुई घण्टाअघि उपस्थित हुन सचिवालयले आग्रह गरेको छ ।

आफ्नो मातृभाषामा सपथग्रहण गर्न चाहने प्रदेशसभा सदस्यले उल्था गरेको सपथको व्यहोरा तीन दिनअघि बुझाउन सचिवालयले आग्रह गरेको छ ।

प्रदेश १ मा प्रत्यक्षतर्फ ५६ र समानुपातिकतर्फ ३७ जना निर्वाचित भएका छन् ।